Viti 2023 do jetë një vit i vështirë si në aspektin e ekonomisë ashtu dhe sa i takon zhvillimeve konkrete politike në Shqipëri. Kështu u shpreh avokati i njohur, Altin Goxhaj, gjatë një interviste të gjatë të dhënë në studion e televizionit Fax News.
Ai tha se zhgënjimin e qytetarëve e ka vënë re që tek mënyra se si e kanë festuar vitin e ri, ku sipas Goxhaj ka pasur një atmosferë të vakët pasi njerëzit ndihen të pasigurt për të ardhmen e tyre dhe kjo sjelljeje manifestohet prej pjesës dërrmuese.
“Situata është dëshpëruese si në situatën globale ashtu dhe atë në Shqipëri. Ky vit i ri, nuk kam parë vit më të trishtuar se ky. Kur flisja me shitësit dhe ata thonin se njerëzit janë ndryshe dhe kësaj here dhe më të lodhur”, tha Goxhaj.
Gjatë fjalës së tij, Goxhaj e vuri theksin tek largimi i shqiptarëve, ku tha se numri i qytetarëve që do ikin jashtë do arrijë kulmin. Sipas tij, plani i shpopullimit masiv do të arrijë kulmin përgjatë 2023, duke marrë parasysh faktin tjetërse në vend mungon opozita e fortë.
“Ky vit do jetë një vit i vështirë në aspektin ekonomik, por dhe atë politik. Ky vit është shumë i keq edhe në shpopullimin e Shqipërisë. Shqipëria do të ketë vitin më të madh të shpopullimit, në nëntë vitet e fundit”, tha ai.
Ky vit është vit elektoral pasi më 14 maj do mbahen zgjedhjet vendore, por Goxhaj shprehet se opozita është e dobët në krahasim me partinë në pushtet.
“Parashikoj një situatë elektorale të vështirë, dhe opozita i merr ose nuk i merr 18 bashki. Këta njerëz që bëjnë sikur bëjnë opozitë, këta gënjejnë”, tha ai.
Ai theksoi se reforma në drejtësi, e cila proklamohet si e suksesshme nuk ka bërë gjë tjetër, por vetëm e ka shkatërruar sistemin.
“Ky viti do ketë thyerje rekordesh, sepse duke qenë të njëhershme do të bien shumë në sy. Kjo reformë e shkatërroi sistemin e drejtësisë. Nuk funksionon më gjyqi në Shqipëri. Gjykata e Lartë ka marrë disa vendime kriminale duke shkelur Kushtetutën”, tha ai.
