Një vajzë shtatëvjeçare është qëlluar me armë zjarri së bashku me tre gra teksa merrnin pjesë në funeralin e dyfishtë të një nëne beqare dhe vajzës së saj 20-vjeçare në veri të Londrës.
Policia Metropolitane bën me dije se të katërta kanë pësuar plagë me armë zjarri.
Ngjarja ndodhi në orën dy të mesditës, kur autorë të paidentifikuar që lëviznin me makinë qëlluan me armë jashtë kishës “Shën Aloysius” në rrugën Phoenix përballë stacionit hekurudhor Euston.
Viktimat po merrnin pjesë në shërbimin funeral të Fresia Calderon (50 vjeç) dhe vajzës së saj Sara Sanchez (20 vjeçe) të cilat vdiqën brenda një muaji diferencë kohore nga njëra-tjetra në nëntor.
Dëshmitarët i thanë MyLondon se grupi u qëllua teksa dolën jashtë për të parë fluturimin e pëllumbave pas shërbimit. Nga një makinë me ngjyrë të errët që lëvizte jashtë kishës nisi të qëlloheshin plumba.
“Ishte kaos. Ishte e tmerrshme. Askush nuk e dinte nëse ishte një bombë apo person i armatosur”, tha një dëshmitar.
“Ne po kërkonim vende për t’u fshehur. Ne të gjithë thjesht u përkulëm në qoshe ku mundëm”, shtoi ai.
Të plagosurat u dërguan në spital me lëndime jo të rrezikshme për jetën, megjithëse policia tha se një 48-vjeçare pësoi një traumë që mund t’i ndryshonte jetën.
Edhe 7-vjeçarja u dërgua me urgjencë në spital, por nuk ka asnjë informacion mbi gjendjen e saj.
Nuk është ende e qartë nëse viktimat njihnin nënë e bijë në funeralet e të cilave po merrnin pjesë, apo pse shërbimi funeral u vu në shënjestër të një sulmi me armë.
