Një ngjarje e denjë për filmat e “Hollywood-it” ka ndodhur në orët e vona të mbrëmjes së të enjtes në Maqedoninë e Veriut, ku një i burgosur i dënuar me 20 vite për vrasje, është arratisur nga burgu më i madh në vend, ai i Idrizovës.
I burgosuri 36-vjeçar me inicialet B.M. (nga Tetova) ka kërkuar ndihmë mjekësore për shkak të lëndimeve, që sipas burimeve jo zyrtare, ia ka shkaktuar vetes.
Rojet e burgut duke konstatuar gjendjen e tij e kanë nisur menjëherë në drejtim të spitalit, duke mos e trajtuar me ndihmë mjekësore në institucionin e vuajtjes së dënimit.
Por gjatë rrugës, furgonit të policisë së burgjeve i është prerë rruga nga një makinë tip “Audi”, prej nga ku kanë dal një grup i armatosur personash që kanë çarmatosur rojet dhe kanë “rrëmbyer” të burgosurin.
Sipas mediave vendase në vendngjarje ka pasur të shtëna dhe për pasojë një pjesëtar i policisë së burgjeve ka mbetur i plagosur. Madje i burgosuri ka arritur t’i marrë armën njërit prej policëve dhe nën kërcënimin e saj ka arritur të shpëtojë më lehtësisht.
Policia po vijon hetimet dhe kontrollet e brendshme për personat që duhet të mbajnë përgjegjësi për ngjarjen, ndërsa është konfirmuar se aksioni i arratisjes ishte planifikuar.
Zhurnal.mk nënvizon se personat e armatosur e dinin saktësisht se kur do të dërgohej i burgosuri në spital, e njihnin mjetin dhe megjithëse nuk konfirmohet, ndoshta kishin të dhëna shtesë se sa ishte numri i policëve që do ta merrnin të burgosurin, trajtimi dhe rruga e lëvizjes.
Media “A1on” kërkoi informacion nga Administrata e Zbatimit të Sanksioneve se kush ishte komandanti në detyrë gjatë turnit kur ndodhi rrëmbimi, nëse është e vërtetë që i burgosuri i arratisur vuan dënimin për vrasje, si dhe sa efektivë policie e kanë transportuar të burgosurin, por nuk mori dot asnjë përgjigje.
Nga Ministria e Brendshme e Maqedonisë së Veriut kanë reaguar për ngjarjen duke njoftuar mediat për mënyrën si ndodhi arratisja dhe gjendjen shëndetësore të efektivit që u qëllua me armë.
Njoftimi i Ministrisë:
Më datën 12.01.2023, rreth orës 23:20 gjatë dërgimit të të dënuarit B.M (36) nga burgu i Idrizovës në qendrën urgjente “Nënë Tereza”, përshkak lëndimit të dorës së djathtë, në autostradë drejt Shkupit, tek pompa e benzinës “Lukoil”, furgoni i policisë është ndaluar nga një veturë “Audi” pa targa të regjistrimit.
Personi i dënuar në atë moment i’a ka marë revolen policit shofer I.H, ka gjuajtur në të në pjesën e poshtme të stomakut. Përshkak lëndimit, shoferi ka ndaluar furgonin, ndërsa personi i dënuar është dhënë në ikje. Policët e burgut kanë paraqitur rastin në SPB Shkup.
Polici i lënduar është dërguar në spital për mjekim të mëtutjemë ndërsa me pjesmarësit në ngjarje është kryer bisedë informative. Është dhënë urdhër arrest qendror. Drejtoria për kryerjen e sanksioneve do të bëjë mbikqyrje të jashtëzakonshme në burgun e Idrizovës dhe për të gjitha parregullsitë do të ndërmer masa të nevojshme me qëllim të vërtetohet pse nuk është siguruar asistencë policore për dërgim deri në spital. Do të vërtetohet përgjegjësi edhe për organizimin e dërgimit edhe për lëshimet që kanë sjellë deri te gjithë kjo ngjarje.
Personi B.M nga Tetova kishte qenë i dënuar gjithsej me 21 vite burg, prej të cilave 19 për vrasje dhe 2 për prodhim dhe shitje të lëndëve narkotike. Dënimin po e vuan nga data 28.12.2020 ndërsa do të përfundonte më 17 prill 2040, informojnë nga Ministria e Drejtësisë.
