Një shpërthim me tritol ka tronditur Shkodrën në orët e para të mëngjesit të sotëm.
Shpërthimi është regjistruar rreth orës 03:50 në banesën e Shefit të Seksionit për Hetimin dhe Krimeve në Komisariatin e Shkodrës, Pëllumb Shpati.
Lënda plasëse është vendosur në ambientet e jashtme të shtëpisë tre katëshe dhe nga shpërthimi ka pësuar dëme murri rrethues i saj dhe automjeti i 49-vjeçarit.
Në dëshminë e tij për ngjarjen, vetë shefi i Krimeve Pëllumb Shpati ka mohuar të ketë probleme me persona të caktuar.
“Nuk kam asnjë konflikt me askënd. Nuk e di se kush mund ta ketë bërë”, është shprehur 49-vjeçari.
Sakaq për mediat ka folur edhe babai i Pëllumb Shpatit. Gjergj Shpati ka rrëfyer se kanë qenë duke fjetur kur ka ndodhur shpërthimi i fuqishëm, duke nënvizuar se në banesë ndodheshin 17 persona.
Duke i bërë apel institucioneve shtetërore që të nxitojnë për të zbardhur ngjarjen, ai shprehet se dyshon që shpërthimi të ketë lidhje me detyrën e të birit në Policinë e Shtetit.
“Ka ndodhur në orën katër të mëngjesit. Ishim të gjithë në gjumë. Ishte shpërthim i fuqishëm. Mendoj se ka ardhur për shkak të detyrës së djalit. Probleme me kënd nuk kemi patur. I kërkoj shtetit që të bëjë detyrën dhe ta zbardhë. Kemi qenë 17 vetë brenda shtëpisë, 3 familje nga kati i parë në të tretin”, deklaroi Gjergj Shpati.
Njoftimi i policisë:
Rreth orës 03:50, në lagjen Dobraç, ka shpërthyer një sasi lënde plasëse, përpara banesës së shtetasit P. Sh., me detyrë shef i Seksionit për Hetimin e Krimeve, në Komisariatin e Policisë Shkodër.
Si pasojë janë shkaktuar dëmtime të lehta në banesën e tij, si dhe është dëmtuar automjeti i tij.
Grupi i posaçëm hetimor i ngritur për zbardhjen e kësaj ngjarjeje, nga veprimet e para hetimore, ka siguruar prova që do të çojnë në identifikimin dhe kapjen e autorit/ëve.
Nën drejtimin e Prokurorisë pranë Gjykatës së Rrethit Gjyqësor Shkodër, vijon puna për zbardhjen e rrethanave të kësaj ngjarjeje.
