Kryeqyteti grek Athina është tronditur nga një shpërthim i fuqishëm që ka ndodhur në orët e para të mëngjesit të sotëm në lagjen Maroussi.
Sipas mediave greke shpërthimi, i cili ka qenë aq i fuqishëm sa ka krijuar një krater është shkaktuar nga një bombë që ishte vendosur në klubin e tifozëve të Panathinaikos , në rrugën Anavryton
Nga shpërthimi që ka ndodhur rreth orës 3:40 fatmirësisht ka pasur vetëm dëme materiale në zonën poshtë klubit, por banorët janë ngritur të tmerruar.
Shpërthimi ka qenë aq i fortë sa një banor i zonës është zgjuar i frikësuar dhe nuk është ndjerë mirë, ndaj si pasojë është dërguar për trajtim mjekësor të avancuar në spital.
https://youtu.be/R8NNY2xoPqs
Në vendngjarje kanë shkuar 6 zjarrfikëse, por ndërhyrja e tyre nuk ka qenë e nevojshme pasi nuk ka pasur zjarr.
Ndërkohë në një video nga momenti kur ndodhi shpërthimi është publikuar nga Protothema.gr. Aty shihet se dy persona që lëvizin me një motor kanë lënë lëndën shpërthyese me dinamit jashtë godinës dhe më pas zhduken drejt Avenue Kifissias.
Sakaq, fotot e zonës pas shpërthimit, tregojnë sheshin Kastalia në Maroussi që i përngjan një peizazhi të bombarduar si në luftë.
Vala goditëse shkaktoi dëme të rënda materiale në tetë dyqane, shtatë shtëpi dhe dy makina të parkuara.
Hetimet e policisë po vijojnë për të përcaktuar shkakun e saktë apo llojin e mekanizmit që mund të jetë përdorur në shpërthim dhe kapjen e autorëve të ngjarjes.
