“Drejtësia” duhet se është angazhuar me zell për të shpëtuar nga akuzat penale komisioneren e vetingut Etleda Çiftja. Këtë të Enjte, Apeli i Gjykatës së Posaçme ka lënë në fuqi vendimin e shkallës së parë, që rrëzoi akuzat për “deklarim të rremë të pasurisë” dhe “falsifikim dokumentash” ndaj vetingases.
Vendimi u mor nga trupa gjykuese e përbërë nga gjyqtarët Miliana Muça (kryesuese), si dhe anëtaret Igerta Hysi dhe Daniela Shirka.
Akuzat
Pasi Çiftja u mor u mor e pandehur nga SPAK, ishte Gjyqtari i Posaçëm, Erion Bani i cili rrëzoi argumentat e prokurorisë dhe e shpalli të pafajshme Çiftja në 16 shtator 2022, në vijim të një procesi gjyqësor të mbushur me dyshime, anësi dhe konflikt interesi.
Prokuroria e Posaçme Kundër Korrupsionit dhe Krimit të Organizuar, SPAK, kërkoi 1 vit burg për anëtaren e Komisionit të Pavarur të Kualifikimit, KPK, Etleda Çiftja, të konvertuar në shërbim prove.
Sipas SPAK, nga hetimet e kryera ka rezultuar e provuar tej dyshimit të arsyeshëm se e pandehura Etleda Çiftja, në deklaratën me nr 14568 indeksi, datë dorëzimi 17.07.2017, ka kryer deklarim të rremë te pasurisë, e konkretisht në lidhje me burimin e blerjes së apartamentit të banimit, të dy parcelave tokë arë me sip 1450 m2 dhe me sip 3440 m2, mënyrën e fitimit të pronësisë për dy sipërfaqet e tokave arë si dhe në lidhje me qëllimin e marrjes së një kredie pranë ish-Banka Emporiki – Shqipëri sh.a.
Gjithashtu e pandehura Etleda Çiftja, ka dorëzuar pranë ILDKPKI, një kontratë me përmbajtje të falsifikuar, referuar çmimit të pasqyruar në të, provuar tej çdo dyshimi të arsyeshëm, pasi kjo kontratë nuk përputhet me atë të gjendur pranë arkivës së zyrës noteriale ku është përpiluar dhe pranë ASHK-së në momentin e regjistrimit të pasurisë për të cilën është lidhur kjo kontratë.
Për SPAK-un, kjo kontratë përmban të dhëna të rreme edhe në lidhje me vetë veprimin e pasqyruar në të, pra shitje blerjen e parcelës tokë arë.
Erion Bani e shpalli të pafajshme
Pavarësisht gjetjeve të Prokurorisë së Posaçme, anëtarja e Komisionit të Vetingut, Etleda Çiftja, u shpall e pafajshme nga gjyqtari Erion Bani.
Ky vendim ishte lehtësisht i parashikueshëm, nisur nga një seri rrethanash që e paraprinë atë.
Gjyqtari Bani, i shortuar për të shqyrtuar kërkesat paraprake të të pandehurës Çiftja, kishte kërkuar dorëheqjen nga rasti, nën dyshimet për konflikt interesi.
Gjyqtari, më herët, është konfirmuar në detyrë nga një trupë e procesit të Vetingut, ku relatore ishte pikërisht Etleda Çiftja.
Drejtuesja në detyrë e Gjykatës së Posaçme, Irena Gjoka, e rrëzoi kërkesën për dorëheqje dhe Bani vijoi shqyrtimin e dosjes penale ndaj komisioneres Çiftja, duke e shpallur në përfundim të pafajshme.
Të njëjtin vendim mori edhe këtë të Enjte treshja e Apelit, Miliana Muça, Igerta Hysi dhe Daniela Shirka.
