Instituti i Mjekësisë Ligjore ka përfunduar akt-ekspertimin mjeko-ligjor për dy ushtarakët e sulmuar nga shtetasi rus Mikhail Zorin në uzinën e Gramshit pak muaj më parë.
Prokuroria e cila është duke hetuar për spiunazh dhe dy vepra të tjera penale i ka bërë një pyetje Institutit Mjeko-Ligjor për dëmtimin e dy ushtarakëve dhe në bazë të përgjigjes së tyre, duket se Mikhail Zorin rrezikon që të akuzohet edhe për veprën penale “plagosje me dashje”.
Sakaq në ekspertizë thuhet se ushtarit Ardian Xhaka i janë konstatuar djegie të shtresës sipërfaqësore të lëkurës, dhimbje koke, shikim të turbullt dhe skuqje e tharje fyti si pasojë e ekspozimit ndaj gazit (sprajt).
Të njëjtat dëmtime janë konstatuar edhe ndaj ushtarakut tjetër Aldo Bici, për të cilin dëmtimet e shkaktuara hyjnë në kategorinë e atyre që kanë sjellë për pasojë humbjen e aftësisë së përkohshme në punë në masën mbi 9 ditë.
KONKLUZIONI:
Me shkresën nr. 735 të Institutit të Mjekësisë Ligjore në aktin e ekspertimit mjeko-ligjor nr.735 për shtetasin Ardian Xhaka bazuar në ekzaminimin objektiv, kartelën klinike të QSUT Tiranë, janë konstatuar djegie e shtresës sipërfaqësore të lëkurës, dhimbje koke, shikim të turbullt dhe skuqje e tharje fyti. Këto dëmtime janë shkaktuar nga ekspozimi me gaz (Sprajt). Dëmtimet e shkaktuara hyjnë në kategorinë e atyre dëmtimeve të cilat kanë sjellë për pasojë humbjen e aftësisë së përkohshme në punë në masën 9 ditë.
Në datë 20 gusht 2022 i është kërkuar mjekut ligjor se çfarë dëmtimesh konstatoheshin në trupin e shtetasit Aldo Bici, me çfarë mjeti ishin shkaktuar ato dhe në çfarë kategorie hynin këto dëmtime.
Me shkresën nr.736 Instituti i Mjekësisë Ligjore në aktin e ekspertimit mjeko-ligjor nr.736 për shtetasin Aldo Bici bazuar në ekzaminimin objektiv, kartelën klinike të QSUT Tiranë, janë konstatuar: A dhimbje koke, shikim të turbullt e tharje fyti. B- ekimozë dhe shembje e indeve të buta të dorës së djathtë. Këto dëmtime për pikën A janë shkaktuar nga ekspozimi me gaz (sprajt). Ndërsa dëmtimet për pikën B janë shkaktuar me mjet të fortë mbretës. Dëmtimet e shkaktuara hyjnë në kategorinë e atyre dëmtimeve të cilat kanë sjellë për pasojë humbjen e aftësisë së përkohshme në punë në masën mbi 9 ditë.
Kjo do të thotë se ndaj Zorin mund të ngrihet dhe akuza e plagosjes me dashje. Prokuroria e Elbasanit po zhvillon hetime për disa vepra penale, një prej tyre ajo e spiunazhit pasi është zbuluar se janë fotografuar objekte të rëndësisë kombëtare.
