Dhunimi barbar i 22-vjeçares keniane Joyce Achieng Aoko, e cila jetonte dhe punonte në një kazino në Tiranë, ka bërë që zyrtarë nga Kenia të zbarkojnë sot në Tiranë.
Teksa kanë kaluar disa muaj që Joy mbetet e shtruar në gjendje të rëndë në spitalin e Traumës, dy përfaqësues të ambasadës keniane në Romë e kanë vizituar sot në shoqërinë e nënës së saj, e cila shpeshherë ka bërë apel në mediat vendase për gjetjen e autorëve të ngjarjes.
Gjithashtu dy zyrtarët kenianë i janë drejtuar Komisariatit Nr.1 në kryeqytet, ku po zhvillojnë një takim me drejtuesin Petrit Halo. Mësohet se ata kërkojnë informacion në lidhjet me hetimet që po kryhen për ngjarjen e rëndë, si dhe duan të mësojnë nëse autoritetet shqiptare kanë identifikuar autorët e sulmit barbar ndaj 22-vjeçares.
Po sot ata do të takojnë drejtues të spitalit të Traumës dhe mjekun neurolog që trajton vajzën. Më pas ata do takojnë edhe avokatin që ndjek çështjen e Joy-t, ndërsa gjatë pasdites do kenë edhe një takim në Ministrinë e Jashtme me përfaqësues të këtij dikasteri.
Dy përfaqësuesit e ambasadës kanë ardhur në Shqipëri për të ndjekur nga afër rastin e vajzës dhe për të ndihmuar edhe për procedurat për transferimin e saj në një spital jashtë vendit.
Sakaq, dosja për ngjarjen e rëndë të ndodhur në rrugën “Pandeli Evangjeli” u regjistrua në prokurori për “plagosje të rëndë me dashje”, por më pas iu rikthye sërish policisë për t’u plotësuar.
Ngjarja ka ndodhur më 13 Gusht të vitit që lamë pas kur 22 vjeçarja nga Kenia është dhunuar dhe hedhur nga kati i dytë i banesës ky jetonte më qira së bashku me disa vajza të tjera nga shteti afrikan që ishin të punësuara në vendin tonë.
E reja ndodhej në banesë me 5 persona, katër prej të cilëve shqiptarë, 3 djem dhe 2 vajza përkatësisht.
Sipas raportimeve, mes 22-vjeçares dhe personave ka ndodhur një sherr dhe më pas ata e kanë dhunuar barbarisht dhe e kanë hedhur nga ballkoni i katit të dytë. Edhe pse kanë kaluar disa muaj, ende nuk ka emra konkret të dyshuarish.
