Prokuroria e Posaçme Antikorrupsion ka përfunduar hetimet për dosjen “Gërdeci” që u rihap rreth një vit më parë, duke vendosur që të marrë si të pandehur ish-ministrin e Mbrojtjes së asaj kohe, Fatmir Mediu.
Prokurorët e SPAK kanë thirrur Mediun që të paraqitet sot në orën 14:00 në ambientet e këtij institucioni për t’i komunikuar dy akuzat që rëndojnë mbi të.
Mësohet se ish-ministri do të akuzohet për “shpërdorim detyre” dhe “shpërdorim të detyrës në bashkëpunim me kuadrin komandues ushtarak” lidhur me tragjedinë ku humbën jetën 26 persona dhe shumë të tjerë u plagosën.
Pasi Mediut t’i komunikohet akuza, dosja do t’i dorëzohet për shqyrtim paraprak Gjykatës së Posaçme.
