Media e njohur VICE, rikthen vëmendjen te një ngjarje e disa javëve më parë, të ndodhur në Shqipëri. VICE shkruan për arrestimin e zyrtares Erisa Fero me kanabis.
Media e quan këtë një ngjarje shumë të rëndë, duke intervistuar një ekspert, i cili ngre dyshime se pas këtij trafiku mund të qëndrojë edhe krimi rus. Sipas tij, kjo është çështje sigurie dhe BE do e vëzhgojë nga afër.
Raportimi
Në raportim thuhet se “arrestimi i një zyrtari të lartë të qeverisë shqiptare me gati 60 kilogram kanabis tregon se vendi është ende duke luftuar për të shkëputur lidhjet e tij me korrupsionin shtetëror dhe gangsterizmin, thanë ekspertët për VICE World News”.
“Arrestimi i Erisa Feros, 28 vjeç, më 29 dhjetor në një pjesë të thellë malore të Shqipërisë pranë kufirit me Maqedoninë e Veriut, teksa dyshohej se po transportonte 58 kanabis, u kthye menjëherë në skandal politik- duke marrë parasysh pozicionin e saj në Agjencinë shtetërore të informacionit në Shqipëri, AKSH. Policia shqiptare tha se Fero e përdorte ID-në e saj zyrtare qeveritare si zyrtare sigurie për të shmangur postblloqet dhe kontrollet e policisë. Gjatë arrestimit u ndaluan edhe partneri romantik i Feros, Lekë Basha, 30 vjeç dhe një i dyshuar 17 vjeç, për vepra të trafikut të drogës. Dy të dyshuar në anën e kufirit të Maqedonisë së Veriut, që besohet se do e merrnin drogën, u arratisën pas një ndjekje të gjatë, sipas policisë. Sipas mediave lokale, policia dyshon se të arrestuarit në incident, përfshirë Feron, kanë lidhje me bandat e krimit të organizuar. Krimi ndodhi pasi Shqipëria, anëtare e NATO-s, po përpiqet për një marrëdhënie më të thelluar me BE-në, duke përfshirë anëtarësimin e mundshëm në të ardhmen”, shkruan VICE.
“‘Shqipëria dhe vende të tjera, përfshirë Bullgarinë dhe Rumaninë, kanë bërë përfitime të rëndësishme në luftimin e krimit të organizuar vendas dhe korrupsionit në bashkëpunim me BE-në dhe NATO-n’, tha një zyrtar i lartë i sigurisë së BE-së, që kërkoi të mos identifikohej, duke diskutuar mbi politikën e brendshme europiane. ‘Por ky incident tregon vështirësinë për të luftuar korrupsionin në një mjedis patronazhi si Shqipëria’. Zyrtari tha se me aksesin në sistemet e brendshme të IT-së dhe të informacionit, lidhjet e dyshuara të krimit të Feros mund të çojnë në një rrezik të lartë të transmetimit të inteligjencës te bandat kriminale ose shërbimet e inteligjencës armiqësore. ‘Do të ishte e arsyeshme që një zyrtar qeveritar i dyshuar për trafikimin e sasive të mëdha të drogës në Shqipëri, mund të kishte lidhje me grupet e krimit të organizuar,’ tha zyrtari. ‘Dhe këto grupe sigurisht që janë të përfshirë me krimin e organizuar rus, kështu që ky do të ishte një shqetësim i madh për sigurinë. BE-ja do të vëzhgojë nga afër Shqipërinë për të parë se si do e trajtojë këtë’”, thuhet më tej në artikull.
