Referuar zhvillimeve të fundit në vend, ku në banesën e zyrtares së shtetit, Alda Klosi, e cila ka punuar pranë Arben Ahmetajt dhe Edi Ramës si këshilltare, u grabitën rreth 700 mijë euro në cash dhe bizhuteri, gazetari i kronikës Artan Hoxha ka deklaruar sot se të tilla grabitje kanë ndodhur para 5 vitesh në shtëpitë dhe vilat e disa ministrave.
Sipas Hoxhës, 5 vite më parë ka pasur një seri ngjarjesh ku një grup kriminal ka grabitur banesat e disa ministrave të qeverisë dhe ish-ministrave në vend, teksa shtoi se shuma më e vogël e vjedhur ka qenë 500 mijë euro, ndërsa shirat e tjera shkonin mbi 1 milionë euro.
“Më shumë më bën përshtypje fenomeni, kjo ngjarje dhe mund të mos zbulohej. Unë di plot raste të tjera, kam denoncuar para 5 vitesh një seri ngjarjes ku ndryshe nga sot nuk i dha mundësi medias. Brenda këtij harku kohor një grup enigmatik për kohën arriti të grabiste brenda këtij harku kohor banesat e disa ministrave në detyrë të qeverisë Rama dhe Meta, ish-ministra të PD-së dhe personazhe të rëndësishëm të të dyja kabineteve. Shumat e grabitura shkonin nga 500 mijë euro, 800 mijë, 1 milionë e 100 mijë, etj. Në të gjitha këto raste ngjarjet jo vetëm që nuk u denoncuan, por kur policia e merrte vesh, shkonte dhe paraqitej pranë banesave të zyrtarëve dhe ata thonin që nuk ishte e vërtetë”, tha ai.
Hoxha theksoi se ngjarjet jo vetëm që nuk denoncoheshin nga pala e vjedhur, por dhe kur policia njoftohej dhe paraqitej pranë tyre ata mohonin grabitjet. Sakaq, Hoxha zbuloi më tej se grabitësit e dinin që ministrat kishin në dorë tendera të rëndësishëm, duke supozuar se ata ishin vendosur nën përgjim para se të vidheshin.
“Në një rast tjetër u tha që u grabit banesa e prindërve, por në asnjë rast nuk u pranuan grabitjet. Dyshimet ishin se atë kohë ka qenë ministër Tahiri, dhe u bë shqetësuese për grupet rivale se kundërshtarët ishin fuqizuar nga paratë që po u merrnin ministrave. Ata e dinin që kishin tendera të rëndësishëm në duar, ata shkonin të ministri i infrastrukturës për shembull se e dinin që kishte tender, u krijua ideja që ata ishin përgjuar dhe më pas ishin sulmuar. Nuk është hera e parë që grabiten shtëpitë e zyrtarëve në Shqipëri, por problemi është se në këtë rast u bë e pamundur të hetohej se askush nuk pranoi të denonconte”, deklaroi gazetari për News24.
