“Luftë e ftohtë” për kontratën mes klubit shkodran dhe sulmuesit Ante Aralica. Kroati ka qenë në listën e largimeve, por në mes është kontrata që i skadon në fund të këtij sezoni dhe mungesa e një konsensusi mes palëve për një zgjidhje me marrëveshje.
Mirëpo, së fundmi situata e sulmuesit duket se i ka ardhur për shtat klubit. Aralica ka pasur shqetësime në shpatull dhe në miqësoren e fundit ndaj Kastriotit nuk u aktivizua. Para startit të ndeshjes, ai u pa të bënte vetëm vrapime rreth fushës, ndërsa më pas u ngjit në tribunën qendrore të stadiumit “Loro Boriçi” dhe ndoqi miqësore bashkë me familjen.
Ai u ul në sektorin e medias dhe nuk iu shpëtoi ngacmimeve të gazetarëve. Tashmë shanset për largimin e tij shtohen edhe më shumë, aq më tepër që edhe deklarata e trajnerit Mirel Josa, konfirmonte krisjen e kroatit me klubin.
