Grabitja e mbi gjysmë milioni euro në banesën e ish-shefes së kabinetit të Arben Ahmetajt në Ministrinë e Financave, Alda Klosi, ka ndezur edhe debatin politik, me opozitën që ngre dyshime për mënyrën sesi një zyrtare e administratës ka arritur të grumbullojë këtë shumë parash të padeklaruar.
Për grabitjen e kryer nga Rozeta dhe Havier Dobi, kreu i Partisë Demokratike Sali Berisha ka reaguar nëpërmjet një statusi në Facebook dhe ka zgjedhur të merret me dyshimet që lidhen me pasurinë e Alda Klosit.
Ndërsa ka publikuar një video-mesazh të gazetarit të ndjerë Kastriot Myftari që denonconte rreth 9 muaj më parë ish-zyrtaren e Ministrisë së Financave, Berisha thotë se Klosi, e cila aktualisht mban postin e këshilltares së kryeministrit Edi Ram, “mbrohet nga ‘SKAP-i’ i partisë, referuar Prokurorisë së Posaçme.
“Ja si e denoncoi 9 muaj më parë gazetari i ndjerë, Kastriot Myftari, ndrikullën e djegësave, këshilltaren e Edi Ramës, Alda Klosin, me gjysmë milion euro nën dyshek. Por ajo mbrohet nga “Skapi” i partisë, sepse lidhjet e saj shkojnë direkt tek bosët e paprekshëm të sipërmarrjes së djegësve Rama-Agaçi-Ahmetaj- Veliaj!”, shkruan Berisha, bashkëngjitur videos.
