Një efektiv policie në Dibër është plagosur nga plasja e një gome kamioni, teksa ishte në detyrë duke menaxhuar trafikun.
Tonin Tosku ndodhet në gjendje të rëndë shëndetësore.
Ngjarja ndodhi rreth orës 14.00, në vendin e quajtur ‘Qenok’, aksi rrugor Maqellarë-Peshkopi.
“Një mjet i tonazhit të rëndë kamion ka pësuar defekt duke bllokuar aksin rrugor. Menjëherë patrulla e Policisë Rrugore ka shkuar në vendin e ngjarjes me qëllim menaxhimin dhe hapjen e trafikut për automjetet. Gjatë momentit që punonjësi i Policisë Rrugore po rregullonte trafikun, ka plasur njëra nga gomat e kamionit dhe është lënduar rëndë punonjësi i policisë rrugore shtetasi T.T. Punonjësi i Policisë është dërguar në spital dhe ndodhet në gjendje të rëndë shëndetësore pasi ka dëmtuar të dy këmbët”, njoftoi policia.
Grupi hetimor nën drejtimin e Prokurorisë ndodhet në vendngjarje, ndërsa pritet helikopteri i Ministrisë së Shëndetësisë për të transportuar punonjësin e Policisë drejt Tiranës për ndihmë mjekësore më të specializuar, shtuan të njëjtat burime.
