Kryetari i PD-së, Sali Berisha e ka përshëndetur zgjedhjen e udhëheqësit të republikanëve, të ligjvënësit amerikan Kevin McCarthy në krye të Dhomës së Përfaqësuesve të Kongresit të SHBA dhe i ka uruar atij suksese.
“Kevin McCarthy zgjidhet Spiker i Dhomës së Përfaqësuesve! Kongresmeni i mirënjohur Kevin McCarthy i cili ka udhëhequr grupin e kongresmenëve republikanë në Dhomën e Përfaqësuesve është zgjedhur Kryetar i Dhomës së Përfaqësuesve të Kongresit të SHBA.
Zgjedhja e tij u arrit pas një dialogu të frytshëm me përfaqësues të “Freedom Caucus” (Grupi i Lirisë). Me këtë rast, ju ftoj t’i urojmë suksese të mëdha Spikerit të ri të Dhomës së Përfaqësuesve Kevin McCarthy në detyrën e lartë dhe shumë të rëndësishme për të cilën u zgjodh.”- shkroi Berisha.
Kevin McCarthy u zgjodh kryetar i Dhomës së Përfaqësuesve pas 15 raundesh me 216 vota kundrejt 212 sa ishin kundër.
Fitorja e zotit McCarthy në votimin e 15-të i dha fund mosfunksionimit më të thellë të Kongresit në mbi 160 vjet. Por kjo ilustroi qartë vështirësitë me të cilat ai do të përballet për të udhëhequr me një shumicë të ngushtë dhe thellësisht të polarizuar.
