Një aksident fatal i ndodhur në “Rrugën e Arbrit” u ka marrë jetën tre personave mbrëmjen e sotme, ndërsa katër të tjerë kanë mbetur të plagosur.
Viktimat janë nga e njëjta familje: Lulzime Istrefi dhe vëllezërit Murat e Kujtim Istrefi, nga Maqellara.
Ndërsa të plagosur kanë mbetur Mërgim Lazri 25 vjeç, Edison Lazri 20 vjeç, Kadrie Markeçi dhe Firuze Istrefi 56 vjeç.
Viktimat dhe të plagosurit udhëtonin në dy automjete të ndryshme që janë përplasur dhunshëm me njëra-tjetrën në aksin rrugor Fushë Bulqizë-Shupenzë, në vendin e quajtur ‘Ura e Gjoricës’. Një zonë pa ndriçim, që besohet të ketë ndikuar në aksident, duke kufizuar fushë-pamjen e drejtuesve.
Përplasja fatale u shënua rreth orës 18:15. “Janë përfshirë në një aksident rrugor 2 automjete dhe për pasojë kanë humbur jetën në vendngjarje shtetasit K.I., dhe M.I., si dhe ka humbur jetën në spital shtetasja L.I. Gjithashtu janë transportuar për ndihmë mjekësore në spital shtetaset F.I., K.M., dhe shtetasit M.L., E.L., pasagjer në automjete. Grupi hetimor ndodhet në vendin e ngjarjes po punon zbardhjen e shkaqeve të aksidentit”, thuhet në njoftimin paraprak të policisë lidhur me ngjarjen.
Nga pamjet nga vendngjarje shihen automjetet e shkatërruara, ç’ka ngre dyshime se shpejtësia me të cilën lëviznin mjetet e përfshira në aksident, ka qenë më e lartë se norma e lejuar.
Po ashtu, dyshohet se mjeti tip Mercedes Benz 240 ku udhëtonin Kujtim dhe Murat Istrefi me dy bashkëshortet Lulzime dhe Firuze Istrefi, ka dalë nga një rrugë dytësore duke dalë nga fshati Gjoricë ku kishin qenë për vizitë dhe në momentin që kanë dalë në rrugën nacionale i kanë prerë rrugën mjetit tip “Mercedez” me targa angleze. Si pasojë e shpejtësisë, përplasja ka qenë shumë e fuqishme dhe mjeti ku udhëtonin viktimat është ndarë në 2 pjesë.
