Nga Boldnews.al
Pasi i ndërtoi një pistë private me fondet publike në resortin “Green Coast”, kryeministri Edi Rama i ka bërë një dhuratë tjetër të çmuar biznesmenit Samir Mane në prag të ndërrimit të viteve.
Këshilli i Rregullimit të Territorit (KRRT), i drejtuar nga Rama, në mbledhjen e datës 28 Dhjetor 2022, ka miratuar vendimin për “Leje Ndërtimi për objektin: “Hangar për avion privat në Aeroportin “Nënë Tereza”, me vendndodhje në Bashkinë Krujë, me subjekt zhvillues shoqërinë “Balfin-Balkan Finance Investment Group sh.p.k”.
Kjo do të thotë se biznesmeni, i konsideruar në media edhe si një ndër “oligarkët” kryesorë në vend, ka siguruar aq të ardhura sa t’i lejojë vetes edhe blerjen e një avioni privat.
Por, për “parkimin” e avionit kërkohet një leje tejet specifike, të cilën mund ta jepte vetëm Edi Rama.
E, natyrisht, kryeministri nuk lëkundet asnjëherë në vendimmarrjet pro Samir Manes.
Rama ka miratuar lejen përkatëse, që Mane të parkojë në pistën e aeroportit ndërkombëtar të Rinasit.
Në vitin 2014, Këshilli i Kombëtar i Territorit (KKT) i dha kompanisë “Green Cost”, të drejtën për të ndërtuar mbi 500 rezidenca private në Palasë, fillimisht, në një sipërfaqe totale prej 18 ha, si dhe të drejtën e përdorimit, për njëzet vjet, të brigjeve në Plazhin e Dhralesë.
Tre vjet më pas, KKT-ja miratoi një tjetër leje. Kompania fitoi të drejtën për të shtuar edhe nëntë vila të tjera, por dhe një hotel njëqind e njëzet dhomash me pesë yje.
Sipërfaqja e truallit u zmadhua me tre hektarë, ndërsa koeficenti i shfrytëzimit për ndërtim, me 30%. Numri i kateve mbi tokë, u rrit me një, ndërsa, nën tokë, deri në tre.
Një investigim i zhvilluar nga agjencia mediatike “Birn”, në vitin 2021, zbuloi se Fondi Shqiptar i Zhvillimit po ndërtonte një helipad (pistë helikopterësh) brenda territorit ku shtrihen godinat e rezidencës luksoze të Samir Manes në Palasë të Himarës, “Green Coast”.
Ndërtimi i pistës së helikopterëve ishte pjesë e një tenderi me vlerë rreth 5 milionë euro të organizuar nga Fondi Shqiptar i Zhvillimit, me objekt “Rikualifikimi urban në Bashkinë e Himarës-Faza II”.
Ky tender u fitua nga kompania “Gjikuria” dhe procedura është shoqëruar me kundërshti të kompanive të tjera pjesëmarrëse.
Në faqen zyrtare të Fondit Shqiptar të Zhvillimit gjendet një njoftim, ku përmendet edhe pista e helikopterëve në zonën e Himarës.
“Në bashkëpunim me CEB, WBIF si dhe Qeverinë Shqiptare janë realizuar rreth 60% e punimeve për ndërtimin e qendrës së shërbimeve të integruara Palasë, rehabilitimit të ballkonit të Potamit dhe parkingut në Dhërmi. Projekti zhvillohet në kuadër të programit “Punët në Komunitet IV”.
Një seri objektesh, në shërbim të komunitetit dhe turistëve. Në këtë qendër do të përfshihen funksione të emergjencave civile si: qendra shëndetësore, post policie, zjarrëfikëse, postë kufitare dhe pistë për ulje helikopteri.
Qendra është projektuar buzë rrugës së plazhit për akses më të shpejtë. Çdo shërbim do të ketë godinën e tij. Dhe të gjitha godinat kanë një shesh të përbashkët shërbimesh, për parkim dhe grumbullim”, thuhet në atë njoftim.
