Janë zbardhur detaje të reja si e kryente skemën e mashtrimit ish-Drejtoresha e Mjedisit në Bashkinë e Tiranës, Viola Sterjo e cila u arrestua ditën e djeshme për akuzën e mashtrimit me pasoja të rënda.
Viola Sterjo u arrestua nën akuzën e mashtrimit me pasoja të rënda, pasi kishte zhvatur nga 20 mijë deri në 90 mijë euro ryshfet nga subjekte të ndryshme në zonën e Korçës kundrejt premtimeve se do të ndërhynte pranë Agjencisë për Zhvillimin Bujqësor dhe Rural, në mënyrë që këto subjekte të fitonin grande.
Bëhet me dije se shtetasi Thanas Sulo ka bërë kallëzim para oficerit të policisë gjyqësore duke thënë se në mars te vitit 2020, përmes një të njohuri të tij që quhet Genti, i cili ka një lokal afër me pikën e tij të karburantit, është njohur me një shtetase të quajtur Viola Sterjo, me origjinë nga Pogradeci.
Kur e ka njohur këtë shtetase ajo i kishte premtuar Gentit qe ai do përfitonte një grand me vlerë 3.5 milion euro nga fondet e institucioneve të shtetit për të bërë një hotel në Voskopojë. Nga Genti denoncuesi ka mësuar se ai i kishte dhënë Sterjos në dorë 160 mijë dollarë amerikan. Ne vijim, Thanas Sulo deklaron se donte që në tokën e karburantit të tij të bënte një hotel dhe i ka kërkuar Gentit, që ta prezantonte me Violën.
Pas bisedave paraprake Viola i ka kërkuar shuma të konsiderueshme parash, duke i premtuar qe ajo do të ndërhynte tek ata qe do t’i jepnin grandin. Sulo i ka dhënë Viola Sterjos 57 mijë euro dhe 1 milion lekë.
Sulo ka deklaruar së shumat e parave ia ka dhënë Viola Sterjos ne Korçë dhe Tiranë. Sipas kallëzuesit, pasi i ka dhënë lekët Viola Sterjos ka qenë në pritje të fitimit të grantit, të cilin ajo ia kishte premtuar se do t’i jepej deri në tetor te 2020.
Por pasi kaloi nëntori dhe dhjetori, në kushtet kur granti nuk u përfitua, kallëzuesi sqaron se i ka kërkuar Viola Sterjos t’i ktheje shumën e lekëve, nën dyshimet se ajo po e mashtronte. Këtë dyshim e përforconte edhe fakti qe edhe shoku i tij Genti, i kishte dhënë Violës 160 mijë dollarë, nuk e kishte përfituar grantin dhe Viola nuk ia kishte kthyer ende paratë.
Prokuroria e Korçës ka pyetur si person qe tregon rrethanat e hetimit shtetasin Olgert Kafaz, i cili ka deklaruar se para 5 vitesh në zonën e Voskopojës ka blerë një sipërfaqe toke së bashku me dy persona të tjerë, për të ndërtuar një resort turistik. Ne kohën që Kafazi punonte në banesën e një shtetasi me emrin Gjergji, ky i fundit i ka folur për mbesën e tij Viola Sterjo.
Ai ka shkuar me Gjergjin në Tiranë dhe e kane takuar Violën. Nga biseda me Violën ka mësuar se ajo kishte mundësi, përmes njohjeve politike qe t’i siguronte atij një grant nga shteti për ndërtimin e resorit në Voskopojë, me vlerë 2 milionë euro. Kafazi i ka thënë Violës se projektin për ndërtimin e resortit e kishte gati. Kafazi ka deklaruar para oficerit te policisë gjyqësore që i ka dhënë Viola Sterjos 90 mijë euro, shumë të cilën e kishte marrë nga ortakët e tij. Fillimisht ai pohon se i ka dhënë 15 mijë euro në dore në Tiranë, ndërsa shumat e tjera ia ka dërguar përmes bankës.
Por në fillim të vitit 2022 ai është informuar se Viola Sterjo nuk kishte bërë asnjë aplikim për përfitimin e grantit, çka bëri që të lindnin dyshimet për një mashtrim të mundshëm.
Ai e ka takuar Violën në prezencë të dy vëllezërve të saj dhe ajo i ka kthyer një shumë prej 20 mijë dollarë. Ndërsa me kontratë noteriale lidhur mes tij dhe Violës, kjo e fundit ka deklaruar se i njeh detyrimin prej 90 mijë euro dhe nëse nuk ia kthente brenda 6 muajve do t’i linte si garanci banesën e vjehrrit
