Deputeti i Partisë Demokratike, Luan Baçi tha se vdekja e 48-vjeçares Shpresa Cani është një lajm i trishtë në prag të ndërrimit të vitit.
Gjatë një interviste për Fax News, Baçi theksoi se raste të tilla të keqtrajtimit të qytetarëve janë të shtrira në gjithë vendin.
“Ngjarje e rëndë dhe e trishtë dhe së pari duhet të ngushëllojmë familjarët e saj. Ky është një rast që fatkeqësisht ndodhi tek bashkia, por janë të shumta rastet që vuajnë nga padrejtësia e këtij pushteti, sepse nuk gjejnë përkrahjen. Shqipëri është në rrezik”, tha ai.
Ai theksoi se Bashkia e Lushnjës është kthyer sot në simbolin e padrejtësive dhe e arrogancës përkundrejt qytetarit.
“Bashkia e Lushnjës është kthyer në simbol të padrejtësive. Pritja që i është bërë kësaj qytetare ka qenë poshtëruese dhe ofenduese, duke parë si njeri pa njeri. Këmbëngulja e saj ka qenë për të vajtur tek paradhoma e zyrës së kryebashkiakes, ka pësuar atë që ka pësuar. Por debatet dhe strersimi, padyshim që edhe jeta e saj e vështirë, ka bërë që të humbasë jetën”, theksoi ai.
Deputeti shtoi më tej se në lidhje me ngjarjen kryetarja e Bashkisë duhet të jepte dorëheqje ose të nxirrte para përgjegjësisë zyrtarët e bashkisë.
“Tentohet që çdo ndodhi të mos bëhet publike dhe të fshihet. Kryetarja duhet të jepte dorëheqjen ose të nxirreshin para përgjegjësisë punonjësit e bashkisë.”, tha ai.
