Fshehja e një “thesari” prej kohësh në vendin që mendonte se ishte më i sigurti brenda shtëpisë për t’i shpëtuar hajdutëve, i është kthyer në një hidhërim një burri nga distrikti i Monteverdes në Itali.
Kjo pasi, ai nuk e kishte llogaritur të ftohtin dhe aq më pak gruan e tij të cilës nuk i kishte treguar gjë.
Historia e pabesueshme raportohet nga mediat italiane dhe ka ndodhur në një banesë në rrugën “Quattro Venti”, ku 20,000 euro cash u bën shkrumb e hi.
Gjithçka ndodhi pasi gruaja vendosi pa lajmëruar të shoqin të ndizte oxhakun e dhomës së ndenjes, ku edhe ishte fshehur “thesari”.
“Kur pashë flakët, gati më ra të fikët”, komentoi pronari i shtëpisë për “Il Messaggero”.
“Mendova se ishte një vend i sigurt, ku hajdutët nuk do të shkonin kurrë për të kërkuar. Gruaja ime nuk e dinte që unë i kisha fshehur atje. Çdo vit, para se të ndizja zjarrin, i lëvizja“, rrëfeu ai, duke pranuar që këtë vit nuk ia doli t’i hiqte në kohë.
