Valon Et’hemi ka qenë protagonisti shqiptar sot në kampionatin turk, teksa ka ndihmuar skuadrën e Istanbulspor që të kthehet te fitoret pas shumë kohësh dhe të ringjallë shanset për mbijetesën në elitë.
Ish-futbollisti i Kukësit, i kthyer në pikë fikse në skuadrën e Superligës turke, ka dhënë sot një provë të aftësive të tij me një gol spektakolar në minutën e 29 të sfidës ndaj Kasimpasa. Me një kundërzbritje të shpejtë në krahun e majtë, ai lëshoi një goditje spektakolare “alla Del Piero”, duke çuar topin poshtë trekëndëshit në cepin e largët të portës.
Një goditje kryevepër që i dha barazimin e përkohshëm Istambulspor që më pas përmbysi rezultatin e ndeshjes duke marrë tri pikë që i japin më shumë shpresë. Për Et’hemin, ky ishte goli i pestë në këtë kampionat në Superligë, teksa ka dhënë edhe 2 asiste.
