Gjykata e Apelit ka marrë sot vendimin që të lërë në burg Gerti Shehun, 31-vjeçarin që sulmoi me grusht në nisje të protestës së 6 dhjetorit, kryetarin e partisë Demokratike, Sali Berisha.
Avokati mbrojtës i Shehut kishte kërkuar nga Gjykata vendosjen e dy masave më të lehta të sigurisë.
Ata gjithashtu i kishin kërkuar gjykatës shtrim të përkohshëm në një institucion psikiatrik, duke provuar të argumentojnë se 31-vjeçari vuan nga çrregullime mendore, por Apeli i ka hedhur poshtë duke lënë në fuqi “arrestin me burg”.
Shehu ka qenë i pranishëm edhe vetë në seancë, duke u kërkuar togave të zeza që ta linin të lirë të shkonte në shtëpi.
“Dua të iki në shtëpi se jam djalë i vetëm dhe dua të marr ilaçet për mjekim”, është shprehur ai.
Njoftimi i Gjykatës së Apelit:
Gjykata e Rrethit Gjyqësor Tiranë, ka zhvilluar gjykimin lidhur me vlerësimin e ligjshëm të arrestit dhe caktimin e masës së sigurimit “arrest në burg”, për personin nën hetim G.SH, i dyshuar për kryerjen e veprës penale te “Goditje per shkak te detyres”, parashikuar nga neni 237/2 i Kodit Penal.
Fakt që lidhet me ngjarjen e ndodhur më datë 06.12.2022, rreth orës 12:25, në momentet kur disa parti opozitare, po organizoheshin per zhvillimin e një tubimi në bulevardin “Dëshmorët e Kombit”, gjatë kohës që nga selia e subjektit politik “Partia Demokratike”, ka dalë zoti Sali Berisha deputet i kuvendit të Republikës së Shqipërisë së bashku me simpatizantë dhe mbështetës së kësaj force politike dhe kane filluar lëvizjen përgjatë bulevardit “Zhan D’Ark”, në drejtim të bulevardit “Dëshmorët e Kombit”, (ish hotel-Dajti), nje person i identifikuar me pas si G.Sh, eshte futur nepermjet grupit te kameramaneve dhe fotoreporteve qe po filmonin marshimin, dhe ka qelluar pa paralajmerim me grusht ne fytyre z. Berisha.
Me vendimin nr. 2508 Akti, datë 09.12.2022, Gjykata e Rrethit Gjyqësor Tiranë ka vendosur: Vlerësimin si të ligjshëm të arrestit në flagrancë të personit nën hetim G.SH. Caktimin e mases se sigurimit “Arrest në burg” parashikuar nga Neni 238 i Kodit Procedurës Penale personal ndaj personit nen hetim G.Sh.
Çështja në apel u shqyrtua mbi bazën e ankimit të bërë nga personi nën hetim G.SH, i cili kërkoi ndryshimin e vendimit caktimin e masës së sigurimit “arrest në shtëpi” ose shtrimin e perkohshem ne nje spital psikiatrik.
Në vijim, Gjykata e Apelit Tiranë, e përbërë nga Relatore Gjyqtare znj. Elona Toro, me vendimin datë 28.12.2022 vendosi: Miratimin e Vendimit Nr.2508 akti, date 09.12.2022 te Gjykates se Rrethit Gjyqesor Tirane.
