Tensionet mes Kosovës dhe Serbisë janë bërë temë kryesore edhe të mediave ndërkombëtare, pas vendosjes së barrikada në lagjen e Boshnjakëve, në veri të Mitrovicës.
Në anën tjetër, presidenti serb Aleksandër Vuçiç i njohur për dramat e tij, ka bërë të ditur se ka ngritur nivelin më të lartë të gatishmërisë ushtarake, duke mobilizuar deri në 5 mijë trupa.
Mjaftuan këto deklarata që BBC, Sky News, AP e The Times por dhe shumë media të tjera të mëdha të raportojnë për tensionet në rritje në Mitrovicë, e madje të përdorin edhe termin “luftë” si pasojë e rrezikut të agravimit të situatës nga ana e Serbisë.
BBC raporton se nga Prishtina zyrtare nuk ka pasur komente mbi pretendimet e serbëve se ata gjoja po përgatiten për sulm në veri të vendit.
Edhe AP në raportin e saj ka theksuar se Serbia që është e armatosur me donacionet ruse, prej kohësh po kërcënon me ndërhyrje ushtarake.
“France Press” raporton se situatës aktuale i kanë paraprirë tensionet, ku pati të shtëna dhe shpërthime pas bllokimit të rrugëve.
“The Times” raporton se ministri i mbrojtjes i Serbisë, Milos Vucevic tha se me urdhër të presidentit Vuçiç ushtria ishte në “nivelin e përdorimit të forcës së armatosur.
“Në veri të Kosovës sot po ngrihen postblloqe dhe barrikada, sipas fotografive të publikuara nga vendasit. Serbia filloi ndërtimin e pranisë së saj ushtarake në zonë që nga e diela kur Milan Mojsilovic, shefi i shtabit të saj të përgjithshëm, u dërgua në kufi. Vuçeviç tha se forcat e tij speciale po rriteshin nga 1,500 në 5,000”, shkruhet në artikull.
Ndërkohë, Deutsche Welle vlerëson se tensionet në rritje ekzistojnë për më shumë se dy dekada pas luftës brutale në Kosovë.
Sakaq, serbët lokalë prej 18 ditësh kanë ngritur barrikada në veri, në shenjë pakënaqësie me arrestimin e ish-policit serb të Kosovës, Dejan Pantiç, i cili dyshohet se ka organizuar sulmin e 6 dhjetorit ndaj anëtarëve të Komisionit të Zgjedhjeve në Veri.
