Vrasja e dy shqiptarëve në një nga lagjet më të populluara të Athinës, Nea Smyrni, tronditi opinionin publik dhe mbetet ende pa autor.
Por hetuesit në Greqi duket se kanë një pistë ku kanë shtrirë “tentakulat” e tyre dhe ajo lidhet me implikimin e 41-vjeçarit Krenshik Çerçizaj dhe 44-vjeçarit Armando Ogranja në trafikun e drogës.
Autoritetet greke kanë qenë të njohura me skedën kriminale të dy viktimave, ndërsa mediat atje kanë ngritur dyshime se vrasja e dyfishtë ka lidhje me ekzekutimin e biznesmenit Edmond Papa në Tiranë.
Ngjarjet kanë ndodhur në harkun kohor të pak ditëve dhe janë duke u hetuar nga autoritetet greke.
Papa, 49 vjeç u vra në një lokal në rrugën “Fadil Bidinaku” në Tiranë me autorin që qëlloi 9 plumba në drejtim të tij.
Nga ana tjetër, 41-vjeçari i vrarë në Greqi ishte arrestuar në Korinth në vitin 2016 pas zbulimit të një plantacioni të madh hashashi, ku dyshohet se ishte i përfshirë edhe biznesmeni që u vra në Tiranë.
Ai njihej edhe si “Nikos” dhe së bashku me Papën ishin dy figurat kryesore të përfshirë në tregtinë e hashashit, por biznesmeni që zotëronte hotel “Blue Sky” në Sarandë kishte arritur të arratisej nga Greqia për në Shqipëri.
Tashmë rastet janë duke u hetuar si të lidhura me njëra-tjetrën.
“Sekretet” e burgjeve
“Nikos”, siç njihej 41-vjeçari Çerçizaj në Nea Smyrni, ishte liruar me kusht nga burgjet greke në vitin 2020 dhe kishte një dosje penale voluminoze.
Ai është akuzuar si anëtar në organizatë kriminale, trafik imigrantësh të paligjshëm, trafik dhe mbajtje droge, armëmbajtje, zhvatje, tentativë vrasje, falsifikim, grabitje dhe vjedhje.
Që nga vitit 2008 ai hynte e dilte nga burgjet pa u ndëshkuar, pasi me daljen e tij binte sërish në paligjshmëri.
Thuhej se sa herë që vuante një dënim në burgjet e vendit, hapte punë dhe gjente bashkëpunëtorë të rinj që, kur të dilte, të ishte gati për hapin e radhës në botën e krimit.
Dukej se 41-vjeçari brenda burgjeve, e veçanërisht në Korydallos, ka krijuar miqësi të ngushta, por edhe hasmëri të forta, kryesisht me bashkatdhetarët e tij shqiptarë.
Për këtë arsye policët me përvojë të Departamentit të Vrasjeve janë në kërkim të informacionit nga brenda burgjeve, pasi kanë të dhëna të vlefshme se porosia e vrasjes së “Ujkut” është dhënë në një nga burgjet helene.
Duke marrë parasysh rrënjët e thella të mafies shqiptare në burgjet greke dhe rastet e mëparshme të porositjes së vrasjeve nga qelitë, një mundësi e tillë nuk përjashtohet.
Ndërkohë, vrasja e dyfishtë është regjistruar nga kamerat në kafenenë e mbushur plot me njerëz dhe policia po përpiqet të kuptojë nëse ekzekutori ka pasur një bashkëpunëtor që luante rolin e kamerierit.
Burimi: enikos.gr
