Mbi 20 mijë persona kanë hyrë në Shqipëri pesë ditët e fundit nga porti detar i Durrësit.
Pika më e madhe kufitare detare në vend është përballur me një fluks të lartë udhëtarësh që hyjnë në vend tonë për festat e fundvitit.
Mëngjesin e sotëm me dy tragetet e linjës Bari-Durrës mbërritën në port 2 740 persona dhe 706 automjete. Nga e enjtja deri të shtunën lëvizja e udhëtarëve është në rritje, ndaj kompanitë e lundrimit operojnë me një numër të shtuar lundrimesh, vajtje-ardhje brenda ditës.
Ky grafik lëvizjesh do të vijojë deri në mesin e muajit janar, por pas natës së ndërrimit të viteve fluksi do të ndryshojë kah. Do të jetë në dalje.
Aktualisht, për të përballuar fluksin, policia kufitare po operon me kapacitet të plotë, duke vënë në funksion sportelet e saj për një përpunim të shpejtë të udhëtarëve dhe mjeteve në hyrje.
