Vrasja e dy shqiptarëve në Greqi, Kreshnik Çerçizaj dhe 44-vjeçarit Armando Ogranja ka vënë në lëvizje autoritetet greke për zbulimin e autorëve.
Mediat vendase e kanë lidhur këtë ngjarje me vrasjen e dy shqiptarëve të tjerë, anëtarë të së njëjtës bandë që merrej me trafikun e drogës. Bëhet fjalë për Ari Papën dhe Dirkenc Halilin. Dyshimet janë se i njëjti person ka ekzekutuar katër shqiptarët për shkak të përplasjeve për trafikun e lëndëve narkotike.
Media greke shkruan se shqiptari Kreshnik Çerçizaj, i njohur me emrin “Nikos” u vra nga një vrasës profesionist i cili veproi me lehtësi dhe tani është arratisur duke humbur gjurmët nga policia.
Hetimet e reja po rrëzojnë mundësinë që konflikti të ketë nisur për shkak të humbjes së 700 kg drogë duke ngritur pistën e një përplasje për pushtet në territore të caktuara të bandave. Dyshimet janë se Nikos ka pasur probleme me disa shqiptarë të tjerë për të ardhurat nga shitja e drogës.
Drejtuesit e policisë nuk e kanë përjashtuar mundësinë që sulmi të jetë porositur nga disa të burgosur shqiptarë në burgjet e Greqisë Jugore të cilët konsiderohen persona të dyshuar për sulme të tilla të ngjashme ndaj rivalëve të tyre grekë dhe shqiptarë.
Njëri prej tyre, sipas medias greke, ishte përpjekur të arratisej nga një tjetër burg rajonal.
