Reperi i njohur Noizy ka reaguar me një Instastory për incidentin e rëndë që ndodhi në koncertin e zhvilluar mbrëmjen e djeshme në Zvicër.
Nga pamjet që u bënë virale në rrjetet sociale, shihej se Noizy dhe bodigardi i tij i “Major Security” u përleshën fizikisht me një grup të rinjsh në klubin e natës ku këngëtari po performonte.
Noizy shihet teksa godet një prej djemve që shkaktoi zënkën, ndërsa në një moment edhe rrëzohet në tokë. Edhe bodigardi i tij personal shihet teksa përplaset dhunshëm me grupin në fjalë.
Në videon sqaruese Noizy shihet në praninë e skuadrës së tij dhe shprehet se nuk ka ndodhur asgjë, duke i cilësuar një grup pijanecash personat që ndezën konfliktin.
“S’ka ndodh asgjë, thjesht ca pijaneca që nuk kontrollojnë dot pijen. U desh me ju tregu sa është sahati. We all good”, thotë Noizy, duke hedhur poshtë aludimet se personat me të cilët u konfliktuan ishin miqtë e reperit Marin.
