I përmbyllur me triumfin e Argjentinës, fituese në finale ndaj Francës, Botërori i Katarit vazhdon të shkaktojë diskutime, ashtu siç vazhdojnë të festojnë tifozët e Albicelestes. Një shfrenim euforie i justifikueshëm, sepse trofeu i madh u kthye në vend pas 36 vitesh “agjërim”.
Botërori i fundit për bardhekaltrit amerikano-jugorë datonte më 1986, në Meksikë, me kapiten Diego Armando Maradona. Misioni u krye më në fund nga trashëgimtari i ’10’, i cili ashtu si ish-lojtari napolitan asokohe tashmë është vlerësuar nga populli argjentinas.
Duke u dëshmuar të jetë një lider në fushë, Messi është heroi i një populli të tërë dhe festohet në mënyrat më të ndryshme këto ditë. Ekstrem ishte ai festimi i një fansi, i cili zgjodhi të bënte tatuazh shumë të veçantë, më pas u shfaq me krenari në rrjetet sociale.
Në imazhe, ai shihet me tatuazhin e përfunduar, me fjalën ‘Messi’ të stampuar në ballë, ‘D10S’ në njërën faqe dhe tri yje në faqen tjetër.
