Feyenoord mbërriti deri në finalen e Conference League, por dështoi të fitonte trofeun në duelin e zjarrtë të 25 majit kundër Romës në “Air Albania”.
Në finalen e zhvilluar në kryeqytetin shqiptar, fitoi skuadra e Jose Mourinhos falë golit të Nicolo Zaniolos.
Trajneri i ekipit holandez, Arne Slot, është rikthyer të flasë rreth ndeshjes në Tiranë, që përfundoi me festën e italianëve.
Në një prononcim për “ESPN”, 44-vjeçari që drejton Feyenoordin prej verës së vitit 2021, theksoi se në finale jo gjithmonë fiton skuadra më e mirë.
“Gjithmonë tentoj ta largoj nga mendja atë ndeshje. Nuk e kam parë asnjëherë më pas finalen… Ndoshta nuk është një mënyrë inteligjente kjo për ta harruar atë disfatë, pasi mund të nxjerrim mësim, por preferoj të mos e mbaj mendjen aty.
Ishte bukur të luanim në finalen e Tiranës, por nuk ka ndjesi më të dhimbshme sesa humbja. Në finale nuk fiton gjithmonë skuadra më e mirë, pasi duhet edhe pak fat. E pamë një gjë të tillë edhe në finalen e Kupës së Botës, Argjentinë-Francë”, u shpreh Slot.
