Gjykata në Belgjikë që po shqyrton dosjen e “Katar-Gate”, pritet të shtyjë me një muaj vendimin për lënien në paraburgim të eurodeputetes greke Eva Kaili, e cila është një nga emrat më të rëndësishëm në skandalin korruptiv që përfshiu Parlamentin Europian.
Edhe pse avokati i eurodeputetes kërkoi që gjykata për të vendoste masën e sigurisë “arrest në shtëpi”, prokurorët belg të çështjes argumentuan se kërkesa ëshë e papranueshme pasi rrezikohet që Eva Kaili të arratiset jashtë vendit.
Në një intervistë për median greke ALPHA, avokati i saj Michalis Dimitrakopoulos theksoi se nuk është optimist për fundin e kësaj çështje, teksa shtoi se prokurorët belg kërkojnë që ajo të futet në burg.
Ai tha se kishte kërkuar nga Prokuroria që Eva Kaili të vendosej në arrest shtëpie dhe të pajisej me një telefon që përgjohet nga autoritetet, dhe të vetmin kontakt të kishte fëmijën e saj.
Por kërkesa u rrëzua gjithsesi dhe madje një prej prokurorëve tha se shërbimet sekrete të Katarit mund të rrëmbejnë ish-eurodeputeten.
Gjithsesi, vendimi zyrtar për zgjatjen e masës së paraburgimit të Eva Kailit apo lirimin me kusht pritet të merret në vijim.
