Skuadra e femrave të Vllaznisë, i dha fund mbrëmjen e sotme, aventurës historike në grupet e Champions-it, teksa u mposht me përmbysje 5-1 nga Reali i Madridit në Spanjë.
Golin e parë të sfidës dhe të të gjithë rrugëtimit në grupe e shënoi Megi Doçi në minutën e 5-të, teksa me një gjuajtje spektakolare nga goditja e dënimit arriti të tunde rrjetën e madrilenëve.
Më pas e gjithë sfida foli për vendaset, që në minutat 11, 18 dhe 21, arritën të shënonin plot 3 gola duke përmbysur shifrat në 3-1. Pjesa e parë përfundoi me këtë rezultat, ndërkohë që në fragmentin e dytë Reali shënoi edhe 2 gola të tjerë duke kompletuar “manitën”.
Pavarësisht triumfit 5-1 në mbrëmjen e sotme, Reali i Madridit nuk arriti të kualifikohej për më tej, teksa e mbylli grupin në vendin e tretë pas Çelsit dhe PSG-së.
