Ka nisur me një përplasje të paprecedentë seanca e fundit plenare për vitin 2022 në Kuvend, ku janë regjistruar debate të ashpra deri në kufijtë e përplasjes fizike midis deputetëve të Partisë Demokratike, Flamur Noka e Luan Baçi me Enkelejd Alibeajn dhe Gazmend Bardhin.
Gjithë debate është krijuar pasi kryetarja e Kuvendit ka njoftuar demokratët se nuk bëjnë pjesë në Grupin Parlamentar të PD, vulën për të cilin e mban Enkelejd Alibeaj.
Noka shpërtheu në drejtim të Alibeajt për vendimin e marrë, ndërsa në një moment, ish-ministri i Brendshëm por edhe Edmond Spaho dhe Oerd Bylykbashi janë ngritur nga vendi dhe kanë shkuar në foltore.
Menjëherë janë afruar rreth tyre oficerët e Gardës së Republikës, ndërsa pas këtij momenti deputeti Luan Baçi është afruar te Gazment Bardhi dhe Enkelejd Alibeaj për të debatuar me tone të ashpra.
Është dashur edhe aty ndërhyrja e Gardës dhe Tritan Shehut për të mos lejuar një konflikt fizik, teksa Baçi i ka cilësuar kolegët e tij si shërbëtorë të Edi Ramës.
