Kryetarja e Kuvendit, Lindita Nikolla ka përjashtuar nga seanca plenare deputetin e Partisë Demokratike, Flamur Nokën.
Me pretendimin se ka bllokuar foltoren e Kuvendit, Noka është përjashtuar nga Kuvendi ndërsa kryeparlamentarja i kërkoi deputetit demokrat që të dalë nga salla. Garda ka rrethuar foltoren për të shmangur ndonjë përplasje të mundshme mes deputetëve.
Lindita Nikolla: “Është turp për këdo që iu shikon! Në respekt të nenit 65 merret masa e përjashtimit të Flamur Nokës nga seanca plenare sepse keni bllokuar foltoren e Kuvendit. Përjashtoheni pasi u paralajmëruat disa herë. Lironi sallën zoti Noka. 5 minuta pushim”.
Çfarë ndodhi sot në Kuvend?
Është shoqëruar me tensione dhe përplasje verbale tentativa e Flamur Nokës dhe e disa deputetëve të tjerë të opozitës për të folur në seancën plenare. Shkak është bërë një shkresë e Enkelejd Alibeajt si kryetar i grupit parlamentar të PD, ku ai firmos largimin nga grupi të 4 deputetëve: Flamur Noka, Albana Vokshi, Edmond Spaho dhe Luan Baçi.
Tre prej këtyre deputetëve bllokuan foltoren dhe kërkuan të flasin, por kryeparlamentarja deklaroi se ata nuk janë pjesë e grupit parlamentar të PD.
Në distancë, ka pasur përplasje verbale dhe fyerje mes Luan Baçit dhe Enkelejd Alibeajt, teksa ky i fundit mes të tjerash dëgjohet që i thotë “legen”.
Noka duke bllokuar foltoren dhe duke akuzuar Lindita Nikollën, nuk kurseu akuzat ndaj Alibeajt, të cilin e konsideroi një vegël të Edi Ramës.
