Armando Broja i është nënshtruar sot ndërhyrjes kirurgjikale në ligamentin e gjurit që kishte këputur pak ditë më parë në një miqësore të Çelsit ndaj Aston Vilës. Futbollisti i kombëtares shqiptare, kishte këputur ligamentet dhe ndërhyrja kirurgjikale ishte e pashmangshme për sulmuesin, që tashmë nis një periudhë të gjatë riaftësimi.
“I lumtur të them që kalova sot në mëngjes një operacion të suksesshëm. Koha që të pushoj para se të filloj rrugën time drejt rikuperimit.
Faleminderit edhe një herë të gjithëve që më kanë dërguar mesazhe mbështetëse”, shkruante Broja në postimin e tij në rrjetet sociale me një foto nga dhoma e tij në spital pas ndërhyrjes.
Tani pritet që Broja të nisë një periudhë të gjatë riaftësimi, e cila minimalisht do ta lërë atë jashtë fushave të lojës deri në fazën përgatitore të edicionit të ardhshëm futbollistik, ku ai pritet të jetë përsëri i gatshëm për klubin e Çelsit dhe kombëtaren shqiptare të futbollit.
