Dy të vdekur dhe një grua e plagosur është bilanci i një atentsti me armë zjarri që tronditi kryeqytetin grek Athinën mbrëmjen e sotme.
Ngjarja që ka ndodhur në një lokal të mbipopulluar nga qytetarë që shihnin ndeshjen finale të Kupës së Botës midis Argjentinës dhe Francës, në lagjen Nea Smyrni.
Viktimat janë të dy shtetas shqiptarë dhe ishin ulur së bashku në ambientet e jashtme të lokalit ku ndodhi ngjarja, kur autori i veshur me një xhup, kapuçin e të cilit e mbante në kokë dhe një maskë kirurgjikale, qëlloi mbi 5 herë në drejtim të tyre.
Mediat greke raportojnë se autoritetet dyshojnë se ngjarja ka ndodhur për shkak të larjeve të hesapeve.
Nga vendi i ngjarjes policia ka grumbulluar tre gëzhoja 9 mm, ndërsa mësohet se shqiptari i parë që u konstatua i vdekur nga policia në vendngjarje ka marrë dy plumba në kokë.
Bashkëkombësi i tij që ndërroi jetë pak minuta më pas ka marrë një plumb në gjoks që si duket ka rezultuar fatal për të.
https://youtu.be/4xXdfF8ejqA
Në pjesën e barkut ka mbetur e plagosur edhe një vajzë, që fillimisht u raportua si pronare e lokalit, por pas qartësimit të informacioneve nga media greke mësohet se ajo ka qenë kliente e ulur në një tavolinë pranë shqiptarëve.
Policia ka nisur “gjuetinë” për gjetjen e personit të maskuar me maskë që kreu atentatin në mes të një lokali të mbipopulluar në sheshin kryesor të lagjes Nea Smyrni
Në pamjet e sigurisë që tashmë janë publikuar nga mediat greke, ekzekutori shihet teksa hyn në pjesën e jashtme të lokalit dhe drejtohet drejt një prej tavolinave ku ishin ulur dy burrat nga Shqipëria.
Ai duket se ka zbrazur armën pesë here drejty tyre dhe më pas arratiset nëpër rrugicat e kryeqytetit helen.
