Një ngjarje e pazakontë ka ndodhur ditën e sotme te “Kisha e Shna Ndout” në Laçit. Në vendin që për besimtarët e krishterë cilësohet një burim shprese, mrekullibërës, një vajzë e re ka tentuar të vetëvritet.
Siç bëjnë me dije burime policore, 29-vjeçarja nga Elbasani Xh.M. ka marrë një taksi dhe ka shkuar e vetme në Kishën e Laçit këtë të Shtunë. Referuar dëshmisë së taksistit për uniformat blu, e reja e cila udhëtonte e pashoqëruar nga persona të tjerë, i ka thënë që mos ta priste, pasi do rrinte një farë kohe aty.
Pasi ka dalë nga automjeti, vajza ka hyrë në kishë. Lëvizjet e saj, shtuan të njëjtat burime pranë policisë lokale, janë filmuar nga kamerat e sigurisë. E reja ka hyrë në kishë, ka lëvizur në ambientet rrotull për disa minuta, e më pas është vetëhedhur nga oborri i kishës duke rënë në humnerë.
Vendi ku ra, një brezore me pemë, sipas hetimeve paraprake, ka qenë faktori kryesor për mbijetesën e saj. Ajo ka rënë nga një lartësi prej 10 metrash, ndërsa më pas ka ngecur në pemë. Humnera përreth Kishës në Laç është e thellë dhe nëse vajza do të binte deri në pikën fundore, me gjasë do të kishte humbur jetën, tha një burim pranë grupit hetimor.
Gjendja shëndetësore
Pasi është nxjerrë prej aty, 29-vjeçarja u transportua te spitali i Traumës në kryeqytet.
“Shtetasja Xh.M. 29 vjeçe, banuese në Elbasan, ka shkuar tek oborri i Kishës së ‘Shna Ndout’ në Laç dhe dyshohet se është vetëhedhur duke rënë rreth 10 m poshtë. Për pasojë, 29-vjeçarja ka marrë dëmtime fizike dhe ndodhet në Spitalin e Traumës në Tiranë, për trajtimin e nevojshëm mjekësor”, thuhet në njoftimin zyrtar të Policisë lidhur me ngjarjen.
Nga burime mjekësore, bëhet e ditur se gjendja e 29-vjeçares vlerësohet jashtë rrezikut për jetën. Por, po sipas të njëjtave burime, ajo ka marrë dëmtime të shumta.
“Me probleme të shëndetit mendor”
Më tej në njoftimin zyrtar të policisë, bëhet e ditur se “nga veprimet hetimore paraprake të kryera, rezulton se kjo shtetase vuan prej disa kohësh nga depresioni dhe merr trajtim mjekësor”.
Burime policore sqaruan se familjarët kanë deklaruar në dëshmitë e tyre se e reja vuante nga një gjendje e rënduar depresioni, si dhe kishte çrregullime bipolare.
