Këshilli i Lartë i Prokurorisë po zhvillon mbledhjen ku do të zgjidhet kreu i ri i Prokurorisë së Posaçme Antikorrupsion (SPAK), në garën ku garojnë tre kandidatët Adnan Xholi, Altin Dumani dhe Ervin Kondili.
Në momentin kur prokurori Edvin Kondili përfundoi prezantimin e platformës së tij përpara anëtarëve të KLP dhe sapo do të nisnin pyetjet në drejtim të tij, në ambientet e KLP u shfaq ambasadorja e Shteteve të Bashkuara të Amerikës, Yuri Kim.
Diplomatja amerikane duket se ka vendosur të jetë e pranishme gjatë kohës kur KLP, në përfundim të dëgjimit të prezantimit të kandidatëve, do të marrë vendim lidhur me kreun e ri të SPAK.
Më herët, diplomatja amerikane ka reaguar përmes Twitter duke kërkuar që procesi i zgjedhjes së kreut të ri të SPAK të jetë i pandikuar, ndërsa në dy javët e fundit ka pasur një përplasje në distancë midis saj dhe kryeministrit Edi Rama, me zërat që flasin për një krisje në raportin e të dyve që lidhet pikërisht me preferencat që kanë ata për kandidatë të ndryshëm në garën për kreun e Prokurorisë së Posaçme Antikorrupsion.
