Personi në foto është 60-vjeçari Menduh Kurt-Deda, trupi i të cilit u gjet i dekompozuar në vitin 2017, në “Kodër Shupa”, në zonë pyjore të Dajtit.
I moshuari nga Dibra që banonte në Lukovë të Sarandës sipas policisë së Tiranës që ka zbardhur plotësisht ngjarjen, është dhunuar dhe më pas është djegur i gjallë nga autorët.
Për ngjarjen janë vënë në pranga 56-vjeçarja Marjeta Karaj dhe 39-vjeçari Gazmir Ngota, ndërsa në kërkim ndërkombëtar është shpallur Besmir Karaj (miku i Ngotës dhe i biri i Marjetës, i cili dyshohet se jeton në Itali).
Shkak i ngjarjes së rëndë të ndodhur 5 vite më parë në zonën e Dajtit në kryeqytet është bërë një borxh prej 1 milionë lekësh të rinj që viktima nuk ia kishte shlyer Marjeta Karajt, me të cilën kishin krijuar një fondacion për kujdesjen e fëmijëve jetim të ushtarakëve, ndërsa kishin edhe një lidhje intime.
Menduh Kurt-Deda fshihej në Tiranë për t’i shpëtuar llogaridhënies për borxhin, por ai është pikasur në zonën e Xhamllikut nga Besmir Karaj dhe Gazmir Ngota, të cilët e kanë marrë peng me urdhër të Marjetës dhe e kanë dhunuar në zonën e Alliasit.
Më pas, dy shokët e çuan 60-vjeçarin në zonën e Dajtit, ku pasi e kanë dhunuar sërish e kanë lidhur dhe e kanë djegur për së gjalli.
Në atë kohë trupi i pajetë u gjet nga barinjtë e zonës, ndërsa identifikimi i tij u bë nga ADN-ja në këmbën e majtë të kufomës, e cila ishte më pak e dekompozuar.
