Kryetari i Partisë Demokratike, Sali Berisha nuk i ka ndalur sulmet ndaj kryebashkiakut të Tiranës Erion Veliajt për të cilin tha se e ka shkatërruar kryeqytetin.
Gjatë takimit me kandidatët fitues të Primareve, Berisha tha se Veliaj e ka 4-fishuar taksën e mbetjeve për biznesin e vogël dhe ka dyfishuar taksën për qytetarët.
“Unë mund të rikujtoj këtu, vetëm kryetarin e betonit të Tiranës. Për sipërmarrjen e tij private që ka me Edi Ramën, Arben Ahmetajn dhe Engjëll Agaçin, ai ka katërfishuar taksën e mbetjeve për biznesin e vogël. Ka dyfishuar taksën e çdo qytetari. Ka shpikur taksën e arsimit, në një kohë kur jo e majta, por edhe e djathta, e ka në gen detyrimin për arsimin falas. Shteti e ka detyrë të shkollojë fëmijët e qytetarëve. Kurse sipas këtij hajduti, shkollat duhet t’i ndërtojnë qytetarët. Me taksa ekstra. Taksë vetëm për arsimin, të cilat i vjedh dhe i shpërdoron në mënyrën më të tmerrshme. Ndërton një shkollë me kosto absolutisht nga 6 deri në 8 herë më të lartë sesa kostoja me të cilën ndërton shkolla PNUD-i i OKB-së në Tiranë, me paratë e donatorëve” tha Berisha.
