Plot 14 vite pas shpalljes së pavarësisë nga Serbia dhe një pune të gjatë për të ndërtuar një shtet të denjë demokratik, Kosova do të përjetojë sot një ditë tjetër të rëndësishme në historinë e saj.
Ashtu siç edhe ishte paralajmëruar mnga kryeministri Albin Kurti, në Prishtinë pritet të mbahet sot ceremonia e nënshkrimit të aplikimit për anëtarësim të Kosovës në Bashkimin Evropian.
Në këtë ceremoni do të marrë pjesë presidentja Vjosa Osmani, kryeministri Albin Kurti dhe kryeparlamentari Glauk Konjufca, ndërsa pas kësaj ngjarjeje pritet të ketë edhe një konferencë për media.
“(14.12.2022), në orën 11:00 do të mbahet ceremonia e nënshkrimit të aplikimit për anëtarësim në Bashkimin Evropian nga Presidentja e Republikës së Kosovës, Vjosa Osmani Sadriu, Kryetari i Kuvendit, Glauk Konjufca dhe Kryeministri, Albin Kurti. Pas ceremonisë së nënshkrimit, Presidentja Osmani, kryetari i Kuvendit Konjufca dhe Kryeministri Kurti do të kenë deklaratë për media”, thuhet në njoftimin zyrtar.
Ndërkohë, Kurti e paralajmëroi këtë hap të rëndësishëm jo më larg sesa dje teksa tha se gjatë kësaj jave do të dorëzohet kërkesa në zyrat e BE.
“Siç e dini, ne jemi vendi i fundit në Ballkanin Perëndimor që po aplikojmë për Bashkimin Evropian edhe pse jemi vendi i parë në këtë rajon për sundimin e ligjit, lirisë dhe demokracisë”, tha Kurti gjatë mbledhjes së qeverisë.
Sipas tij, ka ardhur koha që statusi potencial kandidat, “që na është njohur shumë kohë më parë, ta kthejmë zyrtarisht në status kandidat, duke kaluar në një fazë të re të marrëdhënieve me Bashkimin Evropian”.
“BE-ja është vend i paqes, sigurisë, barazisë dhe prosperitetit, andaj edhe Kosova e ka vendin natyrshëm në këtë shtëpi të përbashkët si një vend paqedashës e demokratik“, tha Kurti.
