Një nga ngjarjet më të veçanta të këtij Botërori ka qenë edhe tragjedia që u përjetua në “Lusail Stadium” gjatë çerekfinaleve. Gazetari amerikan Grent Uahl u nda nga jeta pasi u pikas pa ndjenja në tirbunë në pushimin e ndeshjes mes Argjentinës dhe Holandës.
Një ngjarje e rëndë, edhe për faktin se Uahl ishte i njohur në arenën ndërkombëtare si një gazetar që mbulonte aktivitetet më të rëndësishme për rrjetet televizive amerikane e jo vetëm, ndërsa nuk munguan as teoritë e komplotit për këtë vdekje. Vëllai i tij, i cili është homoseksual, akuzoi se i ndjeri ishte vrarë, duke iu referuar një ngjarje të mëparshme ku gazetarit i ishte mohuar hyrja në stadium pasi mbante një fanellë me flamurin me ylber në shenjë mbështetje të të drejtave të komunitetit LGBT. Deklarata të cilat u tërhoqën më pas nga vëllai i Uahl;.
Kjo, pasi autopsia zbuloi se e vërteta ishte krejtësisht ndryshe dhe këtë e konfirmoi në një komunikatë edhe Selin Gounder, bashkëshortja e tij. Sipas saj bëhej fjalë për “këputjen e një aneurizme të aortës ngjitëse që nuk ishte diagnostikuar dhe që kishte patur rritje të ngadaltë”. Autopsia është kryer në Katar, por edhe në SHBA, ku mbërriti një ditë më parë trupi i pajetë i gazetarit amerikan, për riatdhesimin e të cilit u interesua direkt Shtëpia e Bardhë.
