Një tjetër shqiptar ka humbur jetën në Itali. Ngjarja e rëndë raportohet të ketë ndodhur në Romë, ku 49-vjeçari u gjet i vrarë në banesë nga bashkëshortja e tij.
Sipas mediave vendase viktima është identifikuar si shtetasi Petrit Caka. Gruaja e tij ngriti alarmin pasi e gjeti të mbuluar me gjak në katin e fundit të pallatit.
Menjëherë në vendin e ngjarjes shkuan policia dhe urgjenca, por nuk mundën të bënin asgjë për ta mbajtur në jetë shqiptarin.
Nga Italia raportohet se në fytyrën e shqiptarit kishte lëndime dhe prerje. Kjo provon se ai është dhunuar para se të ekzekutohej dhe mendohet se ai është goditur me një mjet prerës, thikë ose hanxhar.
Caka ishte babai i 3 fëmijëve. Para se të vritej 49-vjeçari kishte shoqëruar fëmijët në shkollë ndërsa gruaja kishte shkuar në punën e saj.
Hetuesit besojnë se autori i vrasjes mund të ketë lënë gjurmë dhe kanë nisur punën për identifikimin e tij, ndërsa nuk përjashtohet pista e një borxhi që mund t’i ketë marrë jetën, pasi shqiptari frekuentonte vazhdimisht kazinotë.
