Një skandal i vërtetë ka shpërthyer në Bashkimin Europian, teksa hetimet për korrupsion në vlerën 600 mijë euro kanë përfshirë Parlamentin e BE-së.
Figura kryesore në këtë skandal është eurodeputetja socialiste greke Eva Kaili, e cila është njëherësh një nga 14 nënkryetarët e Parlamentit Evropian.
Sipas AFP-së dhe gazetës belge “Le Soir” Kaili u shoqërua për t’u marrë në pyetje në Bruksel të premten në mbrëmje në lidhje me hetimin mbi korrupsionin e dyshuar që përfshin “një vend të Gjirit” (i përfolur si Katari).
Burime të Parlamentit Evropian i thanë Euroneës.com se zyrës së Kailit i ishte vënë shiriti nga policia e Belgjikës, së bashku me zyrat e dy eurodeputetëve socialistë belgë, Maria Arena dhe Marc Tarabella.
Maria Arena mohoi çdo përfshirje të saj në këtë akuzë dhe tha se hetimi po bëhej për asistenten e saj, por mëngjesin e të premtes policia belge kishte arrestuar katër persona të tjerë për të njëjtin hetim.
“Shiriti u vendos sepse ajo punoi për OJQ-në Fight Impunity, besoj, në vitin 2019. Nuk ka lidhje me faktin që ajo është asistentja ime”, tha Arena për “Le Soir”.
Katërshja e arrestuar besohet se janë të gjithë shtetas italianë, mes tyre dhe partneri i Kailit, Francesco Giorgi, sipas agjencisë italiane të lajmeve ANSA. Edhe mediat në Greqi dhe Belgjikë raportojnë se një nga katër të arrestuarit është partneri i eurodeputetes 44-vjeçare, e cila është një ish-prezantuese e televizionit grek dhe pjesë e Parlamentit Europian që nga viti 2014.
Partia socialiste greke PASOK, anëtare e së cilës është Kaili, njoftoi të premten në mbrëmje se ajo ishte “përjashtuar” nga anëtarësia.
Zyra e Prokurorisë Federale të Belgjikës tha se gjeti 600,000 euro para kesh dhe sekuestroi kompjuterë dhe telefona celularë në aksionin e të premtes, ndërsa gjatë bastisjes u kontrolluan gjithsej 14 vende.
“Për disa muaj, hetuesit e Policisë Gjyqësore Federale kanë dyshuar për një vend të Gjirit se ndikon në vendimet ekonomike dhe politike të Parlamentit Evropian, kjo bëhet duke paguar shuma të mëdha parash ose duke u ofruar dhurata të majme palëve të treta me rol të rëndësishëm politik dhe/ose pozicioni strategjik brenda Parlamentit Evropian”, thuhet në deklaratë.
Zyra e prokurorit nuk e përmendi vendin në qendër të hetimit, por sipas “Le Soir” ky shtet i fuqishëm që ndikon nëpërmjet “blerjes” së politikanëve në PE është Katari.
Të kontaktuara nga Euroneës, shërbimet e shtypit të Parlamentit Evropian thanë se “Parlamenti Europian nuk komenton procedurat gjyqësore”.
“Si gjithmonë, Parlamenti Evropian bashkëpunon plotësisht me autoritetet kombëtare përgjegjëse. E njëjta gjë në këtë rast specifik”, shtuan ata.
