Skandali korruptiv që ka përfshirë Parlamentin Europian duket të jetë më i thellë sesa mendohej, teksa gazeta prestigjoze belge “L’Echo” konfirmon se eurodeputetja greke Eva Kaili, njëherësh një nga 14 nënkryetarët e PE-së ndodhet në paraburgim dhe jo nën hetim siç u lajmëruar fillimisht.
Ndërkohë, në pranga përveç bashkëshortit të saj italian Francesco Giorgi, ka përfunduar edhe babi i deputetes greke që vjen nga radhët e PASOK.
Sakaq, Kaili u përjashtua sot nga radhët e PASOK, nga vetë kryetari i partisë Nikos Androulakis, i cili në një konferencë urgjente e cilësoi atë si “Kalin e Trojës” të Demokracisë së Re, duke e akuzuar për “shitjen” e idealeve të PASOK dhe gjithashtu për përfshirjen në skemën e përgjimeve ndaj tij, për llogari të partisë qeverisëse të Kyriakos Mitsotakis.
Ndërkaq, sipas “L’Echo” që e konsideron arrestimin e 44-vjeçares si “një bombë të vërtetë në zemër të demokracisë evropiane“, Kaili dhe disa eurodeputetë të tjera kanë përfituar dhurata dhe pagesa në cash nga Katari, duke favorizuar kalimin e ligjeve dhe politikave pro shtetit të Gjirit Persik.
Gjithashtu media belge raporton se në shtëpinë e eurodeputetes u gjetën çanta me para, por shuma ende nuk është përcaktuar.
“Në shtëpinë e nënkryetares së Parlamentit Europian u gjetën çanta me para”, titullohet artikulli me foton e Eva Kailit dhe ku thuhet se janë arrestuar pesë persona në Bruksel dhe dy të tjerë në Itali.
Sipas burimeve, hetimet vijojnë dhe nuk përjashtohet lëshimi i urdhër-arresteve të reja. Po ashtu, sipas “L’Echo” gjatë arrestimit të babait të Eva Kailis, ai dyshohet se “kishte një valixhe plot me para” dhe tentoi arratisjen.
“Ajo është arrestuar në flagrancë, e vetmja mënyrë e mundshme për të rrëzuar imunitetin e saj deputete. Pas arrestimeve në orët e para të mëngjesit dhe sekuestrimin e 600 mijë eurove kash, hetuesit arrestuan edhe babanë e Kaili, gjithashtu me një valixhe të mbushur me kartëmonedha dhe po tentonte të largohej, pasi ishte paralajmëruar nga bashkëpunëtorët”, raporton L’Echo.
Arrestimet u kryen si pjesë e një hetimi për pastrim parash dhe korrupsion të udhëhequr nga Byroja Belge Kundër Korrupsionit, zyra e prokurorit federal dhe hetuesi Michel Klez.
Hetimi fokusohet në veprimet e organizatorit të Kupës së Botës, Katarit, i cili besohet se ka ndikuar në vendimet financiare dhe politike të Parlamentit Evropian duke paguar shuma të mëdha parash ose duke ofruar dhurata të vlefshme.
