Një video e paprecedentë e publikuar nga tabloided britanike tregon një grup shqiptarësh të cilët “luftojnë” për të rrëmbyer një furgon që sipas tyre është i mbushur me kanabis.
Ngjarja ka ndodhur në Farnborough të Hampshire këtë të martë dhe qytetarët që ishin duke hyrë në dyqanin e B&Q kanë mbetur të shokuar nga skena.
Sipas DailyMail, tre shqiptarët që lëviznin me një “Land Rover” janë hequr si policë madje duke përdorur edhe fenelinat e policisë në mjetin e tyre, teksa kanë përplasur vazhdimisht një furgon të bardhë tip “Peugeot”.
Pas kësaj dy persona dolën nga mjeti “Land Rover” për t’u lëshuar në drejtim të dyerve të furgonit në përpjekje për t’i hapur ato.
Land Rover-i i zi më pas shihet duke u larguar, por incidenti nuk ka përfunduar këtu. Duke u rrotulluar rreth makinave të tjera, “Land-Roveri” më pas përshpejton drejt furgonit kokë më kokë dhe përplaset, duke e nxjerrë atë nga hapësira e parkimit.
Oficerët u thirrën në orën 17:35 pas incidentit dhe sekuestruan një sasi të madhe kanabisi në bagazhin e furgonit “Peugeot”. Ata njoftuan gjithashtu publikun se tre personat brenda “Land Rover-it” nuk ishin policë apo detektivë dhe janë të rrezikshëm.
Sa i përket dy burrave që ndodheshin brenda furgonit me kanabis ata janë larguar me vrap nga parkingu para se të mbërrinin forcat e rendit. Pas apelit të policisë, një 31-vjeçar nga Aldershot u arrestua me dyshimin për tentativë për të kryer grabitje.
