Kryeministrja e Serbisë Ana Bërnabiç i ka hedhur benzinë zjarrit të tensioneve midis Beogradit dhe Prishtinës, në një reagim pas ngjarjeve të trazuara të ditëve të fundit në veri të Kosovës.
Për mediat vendase, Bërnabiç ka shprehur mundësinë që Serbia të dërgojë një numër të konsiderueshëm të forcës së sigurisë së saj në Kosovë, ashtu siç edhe është përfolur në media mbrëmjen e djeshme për 1000 trupa që mund të dislokohen me urdhër të Vuçiç.
Sipas Bërnabiç kjo lëvizje vjen pasi Serbia ndihet e kërcënuar dhe do t’i referohet rezolutës 1244 të Organizatës së Kombeve të Bashkuara për këtë vendim.
“Albin Kurti na ktheu të gjithëve jo në shekullin e 19-të, por në shekullin e 18-të. Çdo gjë që ai bën është një rrezik jo vetëm për serbët, por për shqiptarët dhe për mbarë Evropën. Kurti na solli në prag të luftës. Jemi shumë afër që të kërkojmë kthimin e forcave serbe në Kosovë sipas rezolutës 1244”, tha kryeministrja e Serbisë.
Kryeministrja serbe ka vlerësuar se “gjithçka që bën Kurti është rrezik për serbët dhe shqiptarët, por edhe për Evropën”.
“Është politika e shekujve 18 dhe 19. Ajo ngjall ndjenja dëshpërimi. Jam jashtëzakonisht e shqetësuar dhe ishte e vështirë të flija natën e kaluar”, shtoi ajo.
Bërnabiç ka vlerësuar se Kurti nuk po bën asgjë i vetëm, por se ka pasur edhe “ndihmën e partnerëve në BE që nuk po përgjigjen”.
“Në BE nuk reagojnë ndaj asaj që po ndodh, ose reagojnë kur digjet deri në kockë. KFOR-i dhe EULEX-i nuk po e bëjnë punën e tyre, jo vetëm në përputhje me marrëveshjen e Brukselit por edhe me marrëveshjen e Kumanovës. Ata nuk i mbrojnë serbët në Kosovë as në jug e as në veri të lumit Ibër”, theksoi Bërnabiç.
