Flutura Stafa tregon se ka kryer tre ndërhyrje kirurgjikale në shtyllën kurrizore, ka dy unaza në zemër, por nuk ka një shtëpi ku të strehohet dhe as ushqim mjaftueshëm për të mbijetuar. Në një video të filmuar e publikuar nga gazetari Osman Stafa, Stafa i lutet kryebashkiakut Erion Veliaj që t’i japë një banesë sociale . Ajo thotë se ushqehet në qendra sociale, aty ku dhe Bashkia Tiranë e ka punësuar për një vit, por pasi i ka mbaruar kontrata, e kanë larguar që aty.
Flutura thotë se tashmë edhe pastrueset Bashkia i kërkon të reja dhe për rrjedhojë ajo ka mbetur në mes të katër rrugëve, pasi nuk ka as para për të paguar qiranë e ambientit ku jeton. Këtë të fundit, Flutura e përshkruan si një depo me myk, ku bien muret çdo ditë.
Mes lotësh, Flutura shprehet:
“Krejt myk e krejt lagështirë i kam. Unë jetoj tek rruga e Elbasanit, tke rruga “Mihal Grameno”. 130 e kam qiranë, nuk kam as ta paguaj as asgjë. Jam vetëm me këto dy qeset e bukës, i kam marrë tek qendra sociale. Jam e sëmurë, me unaza në zemër, me tre operacione në kurriz, nuk kam as me çfarë të jetoj dhe as asgjë. E kam takuar kryetarin Veliaj atë ditë që u bë panairi, ia tregova situatën. I kërkova një banesë soviale bashkisë dhe nuk ma dha. Jetoj në kushte shumë të vështira dhe askush nuk më sheh mua. Ajo ku jetoj unë nuk është shtëpi, por si depo. Bien të gjitha muret dhe ka myk të madh.
Kam nevojë për një banesë sociale që ditën e Vitit të Ri të hyj edhe unë e të jetoj, jam e sëmurë me zemër, jam e vetme. Kam punuar në qendrën sociale, bashkia me futi për një vit që të pastroja. Kontrata mbaroi dhe mua më hoqën aty. Më thanë që Ministria e Punëve kërkon punëtorë të rinj dhe jo të vjetër. Unë ju luta, u thashë, ‘ju lutem më ndihmoni se e dini situatën time’. Të gjithë e dinë situatën time, jam duke trokitur shoqatë më shoqatë të më japin një kile vaj e oriz se s’kam as bukë të haj. I bëj thirrje zotit Erion Veliaj, me shpirt i lutem të më japë një banesë sociale që në Vitin e Ri të futem në shtëpi. Jam Flutura Stafa, nga Tirana, babin e kam me origjinë nga Shijaku, ndërsa mamin dibrane”.
