Aksin e paprecedentë të dhunës që u regjistrua pasditen e sotme ndaj kreut të PD Sali Berisha gjatë protestës së opozitës e ka dënuar edhe ish-Presidenti Bamir Topi.
“I rëndë dhe i shëmtuar akti ndaj Berishës”, u shpreh Topi në “Frontline” për sulmin me grusht nga 31-vjeçari Gert Shehu.
“Fatmirësisht mbeti aty sepse në një situatë të tillë një i ri fizikisht i fortë mund të kalonte shumë keq situata. Por la një shije shumë të hidhur. Kjo tregon që në këtë shoqërinë tonë pavarësisht asaj që thuhet rreth personalitetit të njeriut që goditi Berishën, shumë gjëra në këtë shoqëri janë çoroditur e tjetërsuar”, tha Topi.
Ai ka shtuar se në lidhje me ngjarjen duhet një hetim i hollësishëm nga institucionet përkatëse, pasi përbën precedent të rrezikshëm në demokraci.
“E dënoj këtë akt dhune dhe në rastin specifik edhe më shumë, sepse bëhet fjalë për një politikan karriere, një ish president, ish kryeministër, personalitet publik, që përtej karrierës ka edhe vite mbi supe. jemi mësuar të themi t’ja lëmë në dorë organeve ta hetojnë, por duhet një hetim i hollësishëm. Duket si precedent i rrezikshëm, kemi kaluar situata nga më të çuditshmet, si në vitet ’90, ‘97-‘98, goditje ekstreme si vrasja e Azem Hajdarit, por një situatë e tillë që ndodh për herë të parë është një kambanë alarmi. Edhe njerëzit që e rrethonin e truprojat ishin të pavëmendshëm sepse ishte një marshim paqeje”, deklaroi ish-Presidenti.
