Një prej të plagosurve me thikë mbrëmjen e djeshme në lagjen Çole, 30-vjeçari Albion Braushi është nisur në orët e para të mëngjesit drejt spitalit të Traumës në Tiranë pasi është në gjendje kritike për jetën.
Babai i tij, 62-vjeçari Xhevdet Braushi ndodhet për momentin në reaminacion pasi gjendja e tij shëndetësore është më e stabilizuar, por nuk mund të paraqitet jashtë rrezikut për jetën pasi plagët në trup janë të mëdha.
Autori i sulmit, Rildi Koçja dyshohet fillimisht të jetë konfliktuar me Albion Braushin mbi të cilin mendohet se ka goditur rreth 10 herë më pas është futur në sherr dhe babai i tij i cili është goditur disa herë në bark gjoks dhe këmbë.
Rildi Koçja, 27 vjeç, banues në Tiranë, është vënë në pranga pas afro një orë kërkimesh teksa ndodhej në lagjen “8 Nëntori”. Dhëndri i familjes pas një konflikti të çastit për motive të dobëta plagosi me thikë vjehrrin dhe kunatin e tij, Xhevdet dhe Albion Braushi.
