Mjeku i njohur epidemiolog Ilir Alimehmeti me 2196 vota të fituara në raundin e parë të Primareve në PD për bashkinë e Tiranës do të jetë kandidati që do të rivalizojë më tej Belind Këlliçin, i cili i priu garës së brendshme me 7 kandidatë me një diferencë prej 2 mijë votash nga vendi i dytë.
Më deputetin e PD që nuk e kaloi dot pragun 50% të përcaktuar në rregullore për Primaret, Tirana shkon në balotazh dhe emri i kandidatit që do të sfidojë Erion Veliajn në zgjedhjet lokale të 14 majit, do të dalë nga përballja Këlliçi-Alimehmeti.
Menjëherë pas përfundimit të procesit të numërimit të votave, Alimehmeti me anë të një postimi në Facebook ka falënderuar të gjithë demokratët, kolegët dhe rivalët e tij për këtë garë model në PD.
Ai gjithashtu shprehet se dita e sotme do të jetë për të pushuar, ndërsa nga nesër do të rifillojë puna në bazë për t’i treguar demokratëve që është ai kandidati i denjë për t’u votuar më 11 dhjetor.
“Pas një gare të bukur dhe pozitive me kolegë demokratë të nderuar, raundi i parë kaloi me balotazh. Faleminderit të gjithë juve që më mbështetët, më votuat dhe më kualifikuat për raundin e dytë më 11 dhjetor 2022! Faleminderit shpirtit të bukur të të rinjve që m’u bënë krahë në çdo moment! Sonte pushojmë, nesër rifillojmë!”, shkruan Alimehmeti.
